Evelyn Wever: Awe ta un dia scur pa pais Aruba

ORANJESTAD – Considera e dia como uno scur, partido di oposicion MEP a reacciona riba e resultado di e quick scan ricibi awe pa College Financieel Toezicht. E solo hecho cu tin un seyo di   CFT riba e documento, ta pone cu gobierno no por scapa y bisa cu no ta CFT a traha e rapport, segun lider di e partido, Evelyn Wever Croes. Pa MEP, ta un berguensa loke ta pasando y cu gabinete Eman II tin cu analisa bon kico nan ta bay haci awor. Nan tin un trabou grandi di bay haci segun Wever, pasobra e resultado di e scan, no ta nada positivo pa e gobierno actual. Segun Wever, e quick scan ta duna e partido rason pa no a firma pro den parlamento, pasobra a considera esaki como uno irealistico. Un termino cu e rapport ta uza varios biaha. Refiriendo brevemente riba e ultimo siman cu a pasa, Wever ta sugeri Eman pa cuminsa traha duro pa drecha nos finanzas. Un siman cu welga di hamber no a yuda pais Aruba na nada, y a mas bien daña e relacionnan cu Hulanda. Y partido MEP ta determina, -segun Wever-, pa drecha esaki bek.

Wever a informa NoticiaCla dialuna atardi, cu nan no a haya un reaccion di gobierno riba nan ‘man’ saca pa yuda pa bay hulanda y drecha cos. E oferta ta keda valido, contal cu ta pa Aruba ta traha y no pa nan mes. Xiomara Ruiz a repasa varios citadonan y partinan di e rapport, indicando punto pa punto kico tur lo ta malo y con mester bay drecha. Y na final a conclui cu e situacion cu Aruba ta aden aworaki, dificilmente por bisa cu cos ta bon y cu ‘nada no a pasa’.