Seleccion di Corsou Sub Campeon Serie Mundial 2022 Little League ta bolbe nan isla awe tardi!

WILLEMSTAD – E seleccion di Corsou di Little League cu a sali Sub Campeon di Serie Mundial 2022 Little League y Campeon Internacional un dia prome, ta bolbe nan isla awe dialuna atardi. E buelo; ta yega Corsou 3’or unda cu despues Gobierno ta ofrece nan un almuerzo, sigui pa un parada riba e ruta di Carnaval, pa atardi tin e encuentro riba Brion Plein. 

E WEGA

Despues di un tremendo wega diasabra unda cu Corsou a gana e grandinan di Chinese Taipei cu score di 1-0, nan a cay venci contra un Hawaii superior, pero a duna tur cu tin pero na final mester a keda contento cu e titulo di Sub Campeon cu e score di 13-3. Na prome instante e wega tabata mustra riba un knock out pa regla, ora cu e score tabata di tal forma cu Corsou mester a logra por lo menos 2 careda pa keda na bida of termina e wega for e di 4 inning. Nan a logra e 2 caredanan y a sigui e wega completo. Asina mes nan no tabata por cu e superioridad di Hawaii cu a dal nan por lo menos 3 careda mas y haci e wega 13-3. Tabata bisto cu nerviosismo a domina nan, y asina mes a purba haci todo por todo. Hugadanan magistral cu nan tabata haci un dia anterior hibando nan na e victoria di diasabra, no a logra materialisa diadomingo cu e consecuencia conoci. Asina mes Corsou a demonstra cu nan tin hopi aden y por ta orguyoso di e ekipo.

PROMOCION Y UNION

Loke Corsou a logra sigur, banda di e parti deportivo, ta e publicidad enorme impagabel cu e isla a haya e siman aki, y sigur e fin di siman aki. Entrevistanan cu mencion di Corsou, imagen y mas, tabata asina hopi y grandi cu si traduci e minutnan so den placa, esaki lo tabata core den decenas di miyones di dollar na promocion. Ademas e union cu e ekipo a logra den fin di siman a pone cu no solamente Corsou, sino tur e islanan di Reino Hulandes, incluyendo Aruba, tabata claba na television diasabra, pero sigur diadomingo, pa wak y sostene Corsou. Diasabra despues di e logro, rednan social a keda inunda cu mensahe di alegria. Diadomingo tabata mescos pero cu Consuelo y apoyo no obstante e derota na man di Hawaii.