Encuesta: Usuarionan ta dividi entre un ‘zakenkabinet’ of e gobierno actual

ORANJESTAD – Segun resultado di e ultimo encuesta cu Noticiacla a tene entre su usuarionan e siman aki, Aruba ta dividi entre si mester sigui cu e gobierno actual pa maneha e situacion dificil cu nos ta aden, of si nos mester cambia esaki pa un gabinete di personanan ‘a politico’, pa un periodo defini. Mientras cu den pueblo e opcion di un gabinete nacional tambe ta wordo scucha, e tabata esun menos popular den e encuesta aki. Un total di 741 persona a participa di cual mayoria tabata homber y e edad cu mas a domina tabata entre 55 y 64 aña di edad reparti riba 6 districto.

GOBIERNO ACTUAL OF ZAKENKABINET?

E pregunta tabata parti di un encuesta mas amplio (otro raportahe) basa riba decisionan recien tuma di e gabinete actual. Como pregunta bonus, tabatin esun cu ta puntra si ta prefera e gabinete actual of mester cambie pa algo otro. Aki ta unda cu opcion pa un zakenkabinet a pasa riba e scogencia di gabinete actual, cu 42% contra 32% respectivamente.  

OTRO OPTION

Loke a hala atencion ta cu mientras cu e opcion cu tambe tabata circula den comunidad den cierto grupo, tabata esun di gabinete nacional, forma pa tur partido cu tin asiento actual. E opcion cu a supera esaki, tabata esun cu a prefera un eleccion nobo (18%) cu scohe un gobierno nacional (8%). E scohencia no ta sorprende mirando e polarisacion cu tin entre partidonan di tanto gobierno como oposicion, gran parti pa gritonan haci den direccion di otro, y tambe pa e punto di salida di e partidonan. Tin un division basta grandi entre e partidonan (sigur esnan mas grandi) cu ta haci e opcion di un gabinete nacional, no popular.

DISCLAIMER

Manera semper, e resultado di e encuesta aki, ta pa metanan puro noticioso. Ademas, tambe, no ta pretende cu e resultadonan obteni ta un refleho di Aruba completo, sino di usuarionan cu tin aceso na e portal noticiacla. Un total di 741 persona a participa na e encuesta (e mester ta minimal 500 pa por tin un representacion), di cual mayoria tabata hende homber den e caso aki.