Hutting: Proyecto parke molina Urirama ta sigui sigur !

ORANJESTAD – “E proyecto ta sigui sigur”. Esey tabata un confirmacion di e persona encarga pa e proyecto di parke di molina pa Urirama, Henk Hutting. E la confirma na NoticiaCla.com cu sigur e proyecto ta sigui, pero solamente no tin un fecha fiho. “E dia pa sigui, ta den man di corte” Hutting a sigui bisa. E la confirma tambe cu recientemente e tabata den corte na Aruba pa presencia e caso cu varios grupo a entama contra di e proyecto. Esey sinembargo no ta stroba e proyecto di sigui.

PUNTO DI BISTA

“Mi tabata presente (den sala di corte) como ‘oyente’, mescos cu 6 residente di e area” Hutting a splica. E la mustra cu tanten cu hues no duna su veredicto riba e caso, (riba 5 di mei proximo), nos no por cuminsa”. Hutting ta conciente tambe cu e veredicto mas probable lo no ta e fin. “Nos ta sali di e punto di bista cu lo por sigui un caso di apelacion, y como tal nos lo tin cu sinta warda e veredicto ey tambe”, e persona responsabel pa maneho di e parke aki a sigui bisa.”Pues ki dia nos por cuminsa, ta depende di corte. Nos ta warda trankil. Pero e (proyecto) ta sigui sigur” Hutting a sigui bisa.

E CASO

Manera NoticiaCla.com a raporta caba, dia 23 di maart tabatin un caso den corte atrobe riba e topico aki di Urirama. Den e caso aki un total di 4 grupo diferente a hiba gobierno y otro instancianan corte dialuna, pa bringa e proyecto di molina . Ta trata aki di e.o. e grupo di Lissette Malmberg y Junior Croes como habitantenan di e area, grupo di Holmo Henriquez y dos otro habitante. E caso tabata trata e asina yama ‘hindervergunning’ cu gobierno a duna e compania aña pasa april.

ABOGADONAN

Den caso di gobierno, abogado Sjiem Fat a representa minister di husticia Arthur Dowers. Pa e grupo di Junior Croes/Lissette Malmberg, a fungi Miriam Malmberg como abogado. E otro dosnan a defende nan mes.

VADER PIET BEHEER

Vader Piet Beheer tambe a cuminsa un caso contra minister di husticia, pasobra tin un condicion den e permiso cu nan no ta di acuerdo cune. Abogado pa Vader Piet Beheer, tabata mr Lucy Peterson E caso mes a cuminsa 8:30am y tabatin 4 ora reserva pa trata tur e puntonan di e caso. E veredicto di e caso aki lo ta dia 5 di mei proximo.