E aanwijzing conseha pa CAFt ta sigui riba agenda di RMR pa diabierna

DEN HAAG/ORANJESTAD – For di diamars a cuminsa circula cu (Gobierno di) Aruba lo a haya un luna mas di tempo pa ‘regla su asuntonan’, y asina evita un posibel aanwijzing. Esaki den cuadro cu Gobierno di Aruba manera anuncia, tabata trahando pa evita e aanwijzing aki. Esaki a crea e impression cu lo a kita e aanwijzing (instruccion) for di agenda di conseho di minister di Reino Hulandes (RMR) pa diabierna awor pa duna e espacio ey. Sinembargo, for di fuentenan cerca di Gobierno Hulandes, noticiacla a haya confirma diaranson mainta cu e aanwijzing ta sigui riba agenda ainda di RMR. Pues te cu awe diaranson mainta, e ta poni ainda pa wordo trata. Esey no kier men cu Aruba lo haya un aanwijzing garantisa, pero si cu e lo wordo trata, riba recomedacion di e colegio di supervision financiero CAFt. 

E AANWIJZING

Tabata na luna di juli di e aña aki, pa ta exacto 14 di juli ultimo cu CAFt mes a kibra su silencio riba e tema, y a confirma cu ‘No a mira ningun otro opcion cu conseha un aanwijzing pa Aruba’. Esaki debi cu Gobierno di Aruba ainda no kier adapta e presupuesto 2022 conforme e recomendacionan haci. RMR ta esun cu finalmente ta dicidi si ta sigui e conseho di CAFt y duna Aruba e aanwijzing. Un aanwijzing asina, mester cana su caminda y esaki a cana su caminda y awor ta riba agenda pa wordo trata diabierna awor. Si RMR dicidi pa duna Aruba e aanwijzing aki, e ora Gobierno di Aruba tin cu (segun instruccion y contenido di e aanwijzing) haci e coreccionnan necesario na e presupuesto 2022. Aruba na su turno, por bringa e aanwijzing aki, manera cu e la anuncia caba di lo haci, y lo haci esaki via Raad van State. Algo asina a sosode caba den pasado ora cu Corsou a ricibi un aanwijzing algun tempo pasa.  Corso una e occasion ey a gana e caso y mester a ‘revoca’ e aanwijzing. 

APODERA VAN HUFFELEN

Tin sinembargo tambe informacion cu ta circula cu Aruba lo no haya un aanwijzing diabierna, sino mas bien cu e secretario di estado hulandes lo por haya un apoderacion pa prepara e contenido di e aanwijzing y despues RMR por dicidi kico exacto e aanwijzing lo mester contene pa e ora aproba esaki. No ta conoci si, con realistico esaki ta aworaki, pero e ta un posibilidad cu ta wordo discuti den pasio na Aruba. 

ENCUESTA 

Un encuesta cu e portal aki a haci recientemente, a mustra cu 45% a pensa cu e consecuencia lo ta cu Hulanda lo duna Aruba un Aanwijzing (Un instruccion di Hulanda con pa goberna). E siguiente grupo cu a haya mas sosten, ta e 25% cu ta pensa cu Hulanda ta sigui negosha cu Aruba y hunto ta resolve e asunto, pues cu e no tin consecuencia negativo pa Aruba. E otro consecuencia, uno mas serio ta  di 19% cu ta pensa cu Hulanda lo duna Aruba un Algemeen Maatregel van Rijksbestuur (Ta tuma e timon di gobierno over). Y finalmente 12% ta pensa cu nada lo sigui pasa pasobra Aruba ta autonomo y cu e lo regla su propio asuntonan.

CONFERENCIA DI PRENSA

E portal aki a compronde cu tin planea pa tene un conferencia di prensa simultaneo entre e islanan CAS y Hulanda despues di e RMR diabierna, pa asina tin un solo liña di informacion riba e tema aki.