Candela grandi na compania di reciclahe na Barcadera a hala hopi atencion

BARCADERA – Un candela grandi cu a cuminsa riba tereno di e compania di reciclahe Daltra Antilles NV na Barcadera a hala atencion diamars merdia di tur hende, mirando e cantidad grandi y diki di huma cu tabata sali for di e sitio. Hopi a kere cu tabata trata di un candela di dump na Parkietenbos, pero rapidamente a bin compronde cu esaki no tabata e caso. Mirando cu ta trata di hopi producto cu tin reto cu candela, por a tende hopi explosion durante e candela. Bomberonan tabatin problema inicialmente pa combati esaki debi na falta di auto cu awa, y poco poco esaki tabata mehora. No ta conoci con e candela aki a inicia y kico tur a pasa eynan. Keda pendiente pa un relato mas amplio. E ta un noticia den proceso. E potret principal ta cortesia di Cool FM, y e resto ta di NoticiaCla.