Plataforma Ley di Cacho tin directiva nobo

ORANJESTAD - Den su ultimo reunion general Plataforma Ley di Cacho (PLdC) a eligi un directiva nobo. Veterinario Pieter Barendsen a keda eligi como presidente mientras cu Debbie Kunder, Shohaira da Silva y veterinario Andreïna Contreras ta fungi como vice presidente, tesorera y secretaria respectivamente. Pa medio di esey PLdC ta duna un señal cla cu nan kier continua, despues cu sra Trudy Hassell a retira. Sra. Hassell tabata e persona cu a tuma e iniciativa pa yama y uni stakeholders manera polis, veterinario, grupo cu ta sali na defensa di cacho, Servicio Veterinario, Serlimar, Directie Wetgeving y otronan pa brainstorm riba e problematica di cachonan cu ta canando los riba caya.

INICIATIVA

Danki na Hassell su iniciativa PLdC a logra cu e ley di cacho a drenta na vigor prome di januari 2015. E asina yama Hondenverordening, aunke aproba unanimamente den parlamento na 2012 casi lo a finalisa den lachi pasobra, gobierno no a pone placa disponibel pa bin cu’n campaña di educacion rekeri, prome cu e ley por a drenta na vigor. Cu ayudo di voluntarionan y fondonan priva PLdC a logra hiba un campaña educativo durante fin di aña 2014 cu a pone Minister di Husticia, Mr. Arthur Dowers pasa e ley di cacho pa uno activo pa prome di januari 2015.

LEY DI CACHO

Ley ta stipula cu doñonan y cuidadornan mester asumi responsabilidad pa e bienestar di su cacho. Implementacion na prome instancia tambe lo ta dirigi pa hala atencion di doño of cuidador pa tene su cacho riba su tereno y pafor cana cu ne na linea. Ministerio Publico ta stipula boet entre Afl. 300,- y Afl. 1000,- asina facilitando e trabao di polis pa actua riba e ley. Polis ta lansa un project piloto pa gana experiencia y evalua e implementacion. PLdC ta aplaudi e tactica, pasobra ta conoci cu mayoria cacho riba caya tin doño of cuidador. A bira tempo pa mustra nan riba nan responsabilidad di acuerdo cu e ley nobo. Cu mas doño responsabel e problematica di cacho los riba caya por mehora considerablemente y na un manera duradero.

PIKI CACHO FOR DI CAYA

Aunke e ley ta permiti gobierno pa piki cacho, e gastonan envolvi (personal, ekiponan, lugar pa warda cacho, administracion etc) ta asina halto cu no por haci esaki actualmente. No ta cualkier departamento of organisacion por eherce e trabao aki. Actualmente Polis ta confisca cacho solamente ora ta trata di un situacion peligroso. E tarea principal di PLdC ta pa educa hende riba e ley y crea mas doño responsabel. Lema di PLdC ta: “Cu 100% doño responsabel no tin cacho los riba caya”. Pikimento di cacho no ta crea doño responsabel. Pesey e no ta prioridad di PLdC, aunke den casonan specifico e ta necesario pa piki e cacho.

DOÑO RESPONSABEL

PLdC lo keda activo pa crea mas doño responsabel entre otro cu proyecto na scol cu sosten di sector priva. Plataforma ta traha pa uni tur stakeholders y duna nan sosten den nan trabao, manera training pa polis na scol di polis. Tambe por acerca PLdC via Facebook pa informa tocante pregunta of casonan di doño iresponsabel y nos lo purba intermedia. Pa mas informacion bishita : www.plataformaleydicacho.org