Banco Central: Actividad di inversion na Aruba ta debil

ORANJESTAD - Actividad di inversion ta mustra di ta debil, a base di un cantidad di indicadonan relaciona cu esaki. Asina Banco Central di Aruba ta relata den un informe recien. Den e caso aki, importacion di cement a baha basta (-25,5 porciento) den e prome seis lunanan di 2014, compara cu e lunanan corespondiente di 2013. Importacion di metal y trabounan deriva, como tambe e ekipo di makinaria y electrotecnica a cay cu, respectivamente, 15,1 porciento y 8,4 porciento den e prome seis lunanan di 2014, compara cu e mesun periodo di 2013. Exportacion a mustra un tiki crecemento, danki na e actividadnan di turismo na Aruba. Importacion tambe ta mustra di a baha, a base di diferente indicadonan disponible. Pa ilustra esaki, tabata tin un contraccion di 13,7 porciento den e pagonan di residentenan pa turismo den exterior (Januari-Juni 2014/2013), como tambe e bahada den impuesto riba importacion y importacion di container, menciona anteriormente.