Gremionan y sindicatonan a uni: No na introduccion di reforma fiscal pa 2023!

ORANJESTAD – Un total di 17 gremio y sindicato a uni forza y manda bisa gobierno den un carta pa no introduci ningun medida di reforma fiscal ora aña bolter, te ora cu nan haya un chens di evalua e proposicionan riba mesa. Asina e grupo a participa diabierna atardi durante un conferencia di prensa. Mientras cu nan ta pidi pa no introduci nada ainda, e problema ta cu ainda nan no a haya e version ‘final’ pa analisa, y faltando apenas 4 luna pa aña caba, y como tal no ta kere ta prudente pa introduci algo sin mas. Ademas a pidi pa no aumenta ningun otro medida tampoco. Aunke cu e carta ta firma for di 15 di augustus 2022 y ta un dia despues cu gobierno a anuncia cu no ta introduci BTW mas pa awor sino ta mas bien aumenta BBO, e carta ta valido ainda y ta vigente pa gobierno. A informa cu nan lo instala un grupo di 3 experto fiscal cu lo analisa e version final fiscal di gobierno unabez cu esaki keda presenta. 

E GRUPO

Por a nota un aire contento entre gremionan comercial cu nan tin sosten di sindicatonan tambe. E grupo di 17 cu a firma, ta e.o. AFCA, AHATA, AJA, ATIA, ATA, CUA, IAA, KVK, SEPPA, SIMAR, SBNA, SPA, STT, VCMA, VWI y WAB. Fuera di esnan comun, tin joyero, hotelero, F&B, Seguro, contratista y mas. Y tin por lo menos 8 sindicato cu a firma e carta aki tambe. NOTA: E potret ta cortesia TeleAruba.