Hooyboer: Pasonan tuma den caso Kudawecha ta corecto

ORANJESTAD – Tur e pasonan tuma den caso Kudawecha tabata corecto, segun minister encarga cu enseñansa Michelle Hooyboer Winklaar. Den un intento pa desbarata un cantidad di mal informacion duna den ultimo dianan, e mandatario a purba clarifica esaki. Entre nan e noticianan cu ta ‘mucho huiswerk a wordo duna’, ‘e mayor ta amigo personal di minister’, ‘influencia politico’, ‘menasa contra mayor y maestro’, tur ta cosnan cu no ta cuadra cu e hechonan segun e minister. Pa loke ta e accion silencioso, e mandatario no por haci nada contra esaki, y ta respeta e decision ey.

DERECHO DI ACCION

E mandatario a mustra cu ta keda e derecho di e sindicato di maestro pa yama un accion, basa riba varios ‘iregularidad’. E mandatario kier mes momento pa Simar splica kico tur e ‘iregularidadnan’ ta cu nan ta referi na dje, pasobra e no ta na altura di nan. E unico iregularidad awor, ta esun di e maestro suspendi.

ATAKE DI SIMAR

E ta lamenta e atakenan continuo ultimo dianan cu e sindicato tin contra dje, pasobra nan ‘tabatin’ un relacion hopi bon na comienso. Y tur biaha cos a bay bon. “Y ningun momento (a ofrece pa presenta e agenda punten palabra) a trece dilanti preocupacion cu cosnan totalmente no ta bayendo bon den enseñansa. “Ta usando e caso aki pa por trece otro precupacionnan dilanti” e mandatario a sigui bisa. Mientras e ta habri pa cualkier dialogo, e la mustra cu e no por desvia di e trabou cu e tin cu haci, y den e caso aki ta trata di un investigacion cu ta tumando lugar.

MALUSO DI AUTORIDAD DI MINISTER

Acusacionnan cu e caso aki a haya un tinte di amistad personal, y cu a abusa di poder como minister, ‘absolutamente no ta berdad’. Sigur no cu pa via di amistad entre e mayor en cuestion di e alumno, lo a actua asina. “Esaki ta categoricamente no berdad. Mi tin tur backup pa mustra con esaki a bay” Hooyboer a bisa. Tampoco ta asina cu ta e minister a duna ordo pa suspende e persona, manera cu ta wordo bisa. Y ni tampoco si e tabatin e autoridad pa tuma e cierto pasonan. E sindicato di maestro a mustra nan desaprobacion pa e supuesto actuacion, indicando cu e ta menasa e democracia y metemento politico. Un biaha mas, e mandatario a desmenti tur esaki, y cu e lo a surpasa su poder politico. “Tur cos a cana conforme procedura di LMA. Director di DPS ta esun cu ta manda carta y ami como minister di scolnan publico, ta duna e autorisacion pa tuma paso” e minister a sigura NoticiaCla.com awe mainta. Pues segun Hooyboer, ningun momento e la duna ordo riba su mes, pa suspende e maestra en cuestion. “Absolutamente cu no. E (director di DPS) a pidi aprobacion y esey mi a duna”.

MAESTRO SOSTENIENDO MAESTRA SUSPENDI

Riba e reaccion di e maestronan cu ta sosteniendo nan colega suspendi, e mandatario tin comprension. “Maestronan lo sali na defensa di nan colega. Esey mas cu claro ta nan derecho. Pero ami mester wak no solamente e derecho di e maestro, pero tambe e derecho di e mucha” Hooyboer a bisa. Tur hende tin caminda pa cana. Y e mandatario a subraya cu e tin cu wak e beneficio di full enseñansa y no solamente un parti. Awe tardi tin un conferencia di e sindicato Simar, cu lo trece nan ultimo informacion dilanti.