Simar: Maestronan na preto diamars como forma di protesta

ORANJESTAD - Mirando e tantisimo casonan di maestronan cu Simar ta atende a dicidi di lansa un accion silencioso, cu ta encera simplemente pa maestronan bisti na preto diamars venidero, esta mañan. E sindicato a haya mensahe cla y raspa di su miembronan y tambe di varios maestro y docente cu ta basta. Segun e sindicato, maestronan ultimamente ta hayando nan mes mas y mas confronta cu tur tipo di intimidacion y menasa, falta di respet y specialmente ta sinti falta di balor pa nan trabou diario cu ta aporta na formacion di nan alumnonan.

VARIOS FUNCION

Dia aden, dia afo, segun e sindicato, maestronan ta duna tur di nan parti pa haci lo mehor pa nan studiantenan. Banda di duna les nan ta haya nan obliga di fungi como trahador social, psicologo, polis, enfermero y asta trahador social, pa e tantisimo casonan cu ta presenta nan nan porta di local. Hopi ta esnan cu ta inverti financieramente for di nan cartera den enseñansa y hera ta un scop nan ta ricibi pa danki.

SOLIDARIDAD

Cu e accion silencioso, Simar kier demostra solidaridad na esnan cu ta haya nan mes confronta cu intimidacion, abuso y falta di respet na pia di trabou. Simar y maestronan ta haya cu e maestro tambe merece proteccion, seguridad na pia di trabou y sosten y guia na momentonan cu e ta den crisis of necesidad di tal. E sindicato a pidi pa maestro, docente, uni na e accion silencioso aki y ban demostra nos malcontento y exigi asina mas respet y balor pa nan trabou.