Croes: Ta bolbe reduci aumento di tarifa di awa y coriente entrante 1 di September

ORANJESTAD – Si recientemente e companianan di utilidad a anuncia un aumento considerable di coriente y awa, diamars pa sorpesa, minister Glenbert Croes a anuncia awor un reduccion di  tarifa di e utilidadnan menciona. Segun e mandatario su splicacion, dos siman pasa Utilities, ELMAR, WEB y e minister a reuni cu sindicatonan riba nan preocupacion relaciona cu e aumento di awa y coriente. Durante dicho reunion manera Minister Glenbert Croes mes a expresa, Sindicatonan a bin cu un bon proposicion. Sindicatonan a haci e cuestionamento di pakico pa e grupo di menos entrada, ta haya un aumento ta mas halto. E  mandatario na mes momento a gradici WEB enormemente cu a para habri pa e recomendacionnan di Sindicato. A keda palabra cu lo bolbe bek na mesa despues di dos siman. E dia ey tabata awe. Durante e reunion WEB a bin bek cu e proposicion, aproba pa Gobierno di Aruba, pa honra peticion di e sindicatonan: ta bolbe reduce e aumento di tarifa di awa y coriente entrante 1e di September igual pa tur.

Si antes e aumento tabata 38%, entrante 1 di september lo reduci esaki te na 26%, igual pa tur catergoria di tarifa. E mandatario a aprecia e participacion y recomendacion di sindicatonan y ta gradici WEB pa nan disponibilidad sigui traha hunto pa bienestar di nos pueblo.