Yrausquin: Aunke gran parti ridiculo, e conclusion principal quick scan ta ok

ORANJESTAD – E quick scan presenta pa College Financieel Toezicht riba presupuesto di gobierno, ta confirma exactamente loke cu gobierno di Aruba a bin ta haci. Asina minister di finanzas saliente Juan David Yrausquin a cataloga e ‘tussenrapport’. Un rapport sinembargo cu segun Yrausquin, aunke e la haya un punto positivo aden, ta completamente financia pa gobierno di Hulanda pa proba nan punto. “Nos a wordo impone pa laga CFT traha esaki” Yrausquin a sigura NoticiaCla, y esey e no ta considera husto. Awor cu e rapport ta conoci, gobierno tabata preparando un carta cu contesta pa gobernador, cu dialuna atardi mester a wordo manda. Mes momento Yrausquin no ta mira ningun motibo pa gobernador no firma e presupuesto basa riba e rapport aki, pasobra e ta confirma basicamente loke cu gobierno a bin ta haci cu ta bon.

Yrausquin ta mustra cu un punto di henter e rapport ta positivo, y a priminti pa desbarata tur e otro puntonan cu segun Yrausquin, ta ridiculisa e presupuesto. E raport entre otro, asina Yrausquin ta cuminsa, ta sugeri pa enfoca tur esfuerso di pais Aruba riba presupuesto 2015. Un aspecto cu , -segun yrausquin-, ta para completamente tras di dje. E ta referi na un carta di 15 di mei 2014 na minister Plasterk unda cu e ta sugeri esaki na su persona. Tambe Yrausquin ta referi na e reformanan cu ta wordo sugeri, y ta haci mencion di APFA, unda cu e ley mester wordo traha ainda. Y e implementacion di BBO aunke den un diferente forma, por wordo implementa via AZV. Tur ta puntonan positivo cu e la remarca esaki. Implementacion di un vacature y personeelstop, manera cu CFT ta recomenda, segun Yrausquin tambe a tuma lugar caba. Y finalmente un algemene verplichtingingstop. Tur ta puntonan cu gobierno a compromete cune y tabata bezig cune y ta di acuerdo cu loke ‘ainda falta’.

Pa loke ta e puntonan negativo, gobierno ta sinti, -segun Yrausquin-, cu CFT ta ridiculisa e presupuesto. E mandatario ta sigura cu e presupuesto ta realistico!. Locual cu Yrausquin ta haya hopi interesante cu e mesun rapport cu ta confirma e trabou cu nan a haci, ta purba desacredita nos pais, y bagatelisa e esfuersonan cu ta wordo haci pa e gobierno aki. Mesun momento ta ridiculisa nan mesun ponencianan’. Entre otro ta papia riba ki norma ta papia pa por realisa finanzas sostenibel. Den e parti aki , -segun Yrausquin-, ta papia di un norma manteni na henter Union Europeo di un deficit di 3%, lo no duna confiansa. E ‘3% norm in europa is weinig vertrouwenswekkend.’.

Prensa hulandes lo hari y considera e gobierno hulandes ridiculo “ Mi no tin otro forma pa expresa mi mes” Yrausquin ta bisa. Riba pregunta di NoticiaCla, pakico toch a bay pa CFT, siendo cu a bringa esaki fervientemente, ta pasobra e la wordo impone riba Aruba debi na un forza ‘no igual’. Tambe e rapport no por a papia cos bon di e presupuesto sino esey lo a nifica cu e mandatario (refiriendo na minister hulandes Ronald Plasterk) lo mester baha. E mandatario a sigura na final, cu su retiro ta vigente, y cu e ta irreversible.