- KVK: Mayoria compania ta pensa cu e scarsedad di trahado lo empeora
- HOH: Ocupacion di cama poco poco ta bek na normalidad na hospital
- Video: Ryçond Santos do Nascimento ta considera su entrada den AVP como un eror
- Mas turista Colombiano ta biahando pa Corsou envez di Aruba den 2024
- Minister a anuncia mando nobo temporal na Cuerpo di bombero
ATIA ta pidi Gobierno reconsidera: Mester paga impuesto riba tips!
ORANJESTAD – Despues cu siman pasa e gremio comercial CUA (Comerciantenan Uni di Aruba) a expresa cu e decision pa no cobra impuesto riba tips ta robes, dialuna Aruba Trade and Tourism Assosiation (ATIA) tambe a vocifera mescos. E gremio ta recorda con recientemente Minister di Finansa, mr. Xiomara Maduro, a publica un informe riba red social den cua ta stipula cu den cuadro di e cambionan cu lo forma parti di e reforma fiscal no ta bay cobra inkomstenbelasting riba tips. Basa riba esaki, ATIA ta comunica lo siguiente: ATIA ta y lo keda semper pro-tips, y ta reconoce cu tips ta parti importante di entrada pa cierto persona den cierto trabao y cu e tips ta yuda hasi e trabao atractivo.
LEY PA UN LEY PA TUR
Sinembargo, ATIA ta kere den e principio di ley pa un, ley pa tur. Mescos cu ta paga loonbelasting riba service charge mester paga impuesto riba tips. Ademas, no ta correcto cu e persona den un diferente trabao cu ta bai cas cu menos placa mester paga belasting y esun cu ta hiba hopi placa di tip cas ta paga nada. Na otro país, manera Hulanda y Merca, ta normal cu e empleado cu ta ricibi tips mester declara e entrada tur aña y paga inkomstenbelasting.
SIN IMPUESTO RIBA TIPS, LO COBRA IMPUESTO OTRO CAMINDA
Si no cobra e belasting riba tips esey kiermien cu gobierno lo hisa su entrada via otro belasting manera un tarifa mas halto BTW cu ta afecta henter Aruba y cu consecuencia significante riba inflacion. Aruba ainda ta recuperando di e pandemia y locual mester haci awo ta percura pa bienestar economico di un y tur.
DISCREPANCIA Y DESIGUALDAD
Un decision di no cobra inkomstenbelasting riba tips lo mantene descrepancia y desigualdad den nos comunidad y causa costo di bida mas halto pa tur. ATIA ta haci un yamada pa reconsidera e decision relaciona cu reforma fiscal y considera un tarifa di impuesto riba tips.
Aruba Trade and Industry Association (ATIA) a wordo funda na aña 1945 y ta e organisacion principal cu ta representa empresanan, empresarionan y comercio na Aruba. E meta di ATIA ta pa defende, promove y proteha e interesnan di su miembronan y comercio di Aruba en general. Pa mas informacion por bishita www.atiaruba.org y nos rednan social www.facebook.com/arubatrade.
KVK: Mayoria compania ta pensa cu e scarsedad di trahado lo empeora
ORANJESTAD – Mayoria compania ta pensa cu e scarsedad di trahado na Aruba lo empeora. Asina Camara di Comercio ta raporta diaranson.
Mas turista Colombiano ta biahando pa Corsou envez di Aruba den 2024
BOGOTA – Mas turista Colombiano a bay Corsou envez di Aruba. Asina presidente ehecutivo di Asociación Colombiana de Agencias de Viajes y Turismo, (ANATO), Paula Cortés Calle ta raporta segun un raportahe di e portal Colombiano El Nuevo Siglo ta raporta. Mientras cu paisnan manera Merca, Spaña, Panama y Republica Dominicano ta conta pa 69% di e Colombianonan cu ta biaha pa exterior, e pais cu mas crecemento ta Corsou cu 157% di participacion, compara cu Aruba cu tin ‘apenas’ 63%. Hasta Hulanda tin mas trafico di Colombia, na 81%. Pero ta sigui Aruba cu 47% y Panama cu 44%. Segun ANATO, e prome trimester di 2024, 1.345.687 Colombiano a biaha pa exterior, cu ta un aumento di 13%, compara cu e mesun periodo aña pasa. “E resultadonan positivo aki ta refleha e recuperacion di turismo saliente, cu ta beneficia e industria relaciona, den e area, hotel y restaurant, entre otro” Cortés Calle a finalisa bisando.
Pa aña 2024 y 2025, ATIA lo enfoca mas riba e tema laboral
ORANJESTAD - Diabierna 19 di april 2024, Aruba Trade and Industry Association (ATIA) a tene su reuniun general di miembrecia den e sala di conferencia di ATIA.
Aruba Bank ta presenta un serie di entrevista cu su Mortgage Advisors – “Caweta di Hipoteca”
A.T.A: Turismo ‘stayover’ pa Aruba a crece cu mas di 25% den maart 2024
ORANJESTAD - Den e prome kwartaal di 2024, a conta cu cifranan prometedor pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA, a bisa den un comunicado. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi. Capacidad di carga tambe ta sigui ricibi atencion di parti di A.T.A. di diferente manera.
Aruba ta den e top 5 pa loke ta e hafnan pa crucero den Caribe
ORANJESTAD – Aruba (y Corsou) ta figura den e top 5 di hafnan pa barconan crucero segun e portal cruisefever.net. Ta considera Aruba esun mas conoci di e islanan ABC, segun e portal. E haf di Aruba ta popular pa cruceronan cu itinerario di 8 pa 12 dia. E beachnan blanco, historia colonial, y e seguridad ta motibonan pa e escogencia aki. No descuida pa e oportunidad di compras tambe. Corsou tambe ta figura den e top 5 na di ultimo lugar, esta #5 compara cu Aruba cu ta na number 2. E edificionan colonial tambe y e ciudad Willemstad, e rifnan colorido y e cafenan interesante tabata motibo suficiente pa scohe e isla tambe. E prome pais den Caribe ta St Maarten, sigui pa Aruba, Grand Cayman, San Juan y Corsou.
Follow NoticiaCla
