Hooyboer: Simar usando mal informacion riba caso maestra suspendi

ORANJESTAD -  "Te ainda mi ta wardando pa SIMAR haci pregunta riba e caso aki. Nan a pidi un reunion despues di vakantie, pues cu mi, nan no a papia ainda", asina Minister di Enseñansa, Michelle Hooyboer-Winklaar a duna di conoce. E ta referi na e discusion riba e maestro di Scol Primario Kudawecha cu ta bou di investigacion. Segun e mandatario, e la spera cu e sindicato cu ta representa maestronan di scol, lo a tuma contacto formal cu sea e departamentonan envolvi den e investigacion of cu e minister pa por haya mas informacion y pa sa e status di e studiante. E mandatario ta lamenta masha cu e sindicato ta uzando mal informacion pa lanta speculacion tocante e caso aki y no ta dispuesto pa laga e profesionalnan den e ramo caba cu nan investigacion neutral den cual ta scuchando tur partido envolvi pa por yega na un conseho final. Di otro banda, Hooyboer a subraya cu e juffrouw envolvi ta AO te cu dia 6 di april, esey ta e motibo cu e ta na cas y no pasobra a prohibi entrada na scol. E informacion ey, entre otro, ta incorecto. Mientrastanto a haci un apelacion riba e departamentonan envolvi den e investigacion, pa nan por keda cla mas lihe posibel, na beneficio di tur partido envolvi. E escalacion actual, den cual ta uza muchanan contra otro ta un asunto inaceptabel y cu mayornan no mester permiti. No por uza alumno, riba tereno di scol y permiti pa nan mete den asunto di maestro y su doño di trabou, anto pio permiti cu nan ta acusando un otro colega alumno cu ta den nan mesun klas! Segun e mandatario, no por ta asina cu ta stroba mayornan di busca nan derecho pa un miho educacion di nan yiu, ni culpa nan si nan ta haci esaki. Tur mayor na Aruba tin e derecho y hasta e obligacion di sali na defensa di nan yiu y proteha nan yiu, mescos cu Tur maestro tin e derecho pa defende nan mes contra cualkier acusacion. e departamentonan encarga mester por haya e oportunidad di investiga si e keho ta veridico, sin envolvimento ni di politica, pero tampoco di coleganan,sindicato of prensa y protehando privacidad di tanto e alumno, su mayornan y e maestro concerni.