Sindicatonan ta insisti! Mester paga reparatietoeslag completo fin di augustus awor!

ORANJESTAD – E cinco sindicatonan SIMAR, SPA, SEPPA, SADA y TOPA diaranson (ayera) a informa Gobierno di Aruba (lesa: Prome Minister Evelyn Wever Croes) cu nan ta para riba nan punto y ta exigi pa Gobierno paga nan e asina yama reparatietoeslag completo (AWG 1918,=), den e salario di augustus 2022, esta e luna aki. Asina e sindicatonan a contesta Gobierno su carta di siman pasa. Ademas e ponencia den e carta di Gobierno unda cu minister Maduro (Finanzas) lo a bisa recientemente cu a reserva placa pa paga 5% pa resto di e aña calendario, ta ‘leu di berdad!’. 

RECUPERACION DI TURISMO

Tambe ta haci mencion  di e ponencia di prome minister cu ta sigura cu turismo ainda no a recupera completamente na nivel di prome cu e pandemia di Covid19, mientras cu riba e propio pagina di Facebook di Gobierno ta haci e mencion cu ‘turismo ta registrando cifranan record’ y cu ‘pa 4 luna consecutivo, e recuperacion ta surpasa nivelnan di aña 2019’, pues mustrando cu gobierno ta contradeci su mes den e ponencia aki. 

MESTER PAGA!

Y cu tur e puntonan aki, sindicatonan a informa gobierno cu “consecuentemente e sindicatonan menciona,  ta mantene nan demanda  y su posicion di cu e parti restante di e 7,6%, en particular e  reparatietoeslag di Alf.1.918,-- lo wordo paga integralmente y den su totalidad cu e pago di salario di dia 23 di augustus 2022”. Por lesa e carta completo AKI.