ORANJESTAD - Den luna di mei y juni A.T.A. a haci un encuesta pa asina haya sa ki percepcion residentenan di Aruba tin di turismo- tanto positivo como negativo, enfocando riba e aspectonan di desaroyo economico y desaroyo social. E encuesta aki tawata basa riba preguntanan cu a wordo haci na residentenan na 2018 den un encuesta similar. Originalmente, e preguntanan aki a wordo uza pa un encuesta haci na residentenan di Hawaii encuanto nan percepcion di turismo.
A dicidi di amplia e encuesta di 2022 cu preguntanan adicional, compara cu esun di 2018.
Ta importante pa remarca cu mientras cu no tur cos cu a wordo treci dilanti den e encuesta ta cay bao di responsabilidad primario di A.T.A. como Aruba su Destination Marketing and Management Organization (DMMO), e opinionnan y sugerencianan ricibi ta yuda dirigi e accionnan cu si ta cai bao di capa di A.T.A. y ta yuda A.T.A. den su papel di duna conseho y guia otro organisacionan den e desaroyo turistico desea. A.T.A. ta balora e inclusion di e comunidad ora ta regarda turismo y unda cu por lo invita comunidad pa ta parti di e combersacion y resultado.
Residentenan a wordo encurasha pa yena e encuesta tanto virtualmente como riba papel. A logra colecta 2811 encuesta, sinembargo despues di exclui e encuestanan di personanan cu no ta residente di Aruba y e encuestanan cu no a wordo yena completamente, a yega na un total di 1983 encuesta valido.
Na 2018 a crea perfilnan pa cada generacion pa asina por tin un miho comprendemento di e diferente opinionnan entre gruponan di residente. A haci uzo di e perfilnan aki un biaha mas pa analisa resultadonan di 2022. Pa e encuesta aki a analisa data cuantitativo y tambe cualitativo.
E encuesta a conta cu 35% participante masculino y 65% participante femenino. E grupo mas grandi di participante ta entre 30 y 39 aña (25%). E districto cu mas participante ta Paradera/Santa Cruz (30%). 39% di participante ta casa y 80% ta traha.
Na 2005, Camara di Comercio (KVK) a haci un estudio pa saca afo kico tawata mas importante pa nos residentenan entre desaroyo social y desaroyo economico. 48% di participante a responde desaroyo social mientras 52% a responde desaroyo economico.
Na 2018, A.T.A. a haci uzo di e pregunta di Camara di Comercio den su encuesta- aki por a wak cu 60% di participante a scoge desaroyo social mientras 40% a scoge desaroyo economico. Na 2022, desaroyo social a wordo escogi door di 56% di participante, y 44% a scoge desaroyo economico.
Di esnan cu a scoge desaroyo economico, 52% a indica cu expansion di industrianan cu no ta turismo ta e aspecto di mas importante pa desaroyo economico. Di esnan cu a scoge desaroyo social, 41% a indica cu mas asistencia social ta e aspecto mas importante pa desaroyo social.
Comentarionan relata na e dos tiponan di desaroyo a wordo categorisa debidamente. Pa desaroyo economico e mayor cantidad di comentario a referi na mas pilar economico, finanzas y mehoracion di producto. Pa desaroyo social e mayor cantidad di comentario a referi na mas enfoke riba nos comunidad/ e aspecto social, balans y educacion.
A haci diferente pregunta unda participantenan mester a indica entre 1 cu 5 nan sentimento riba diferente topico, unda 1 ta extremadamente negativo y 5 ta extremadamente positivo.
Entre 1cu 5, participantenan a indica cu un averahe di 3.8 cu turismo tin un impacto positivo riba Aruba en general. Entre 1 cu 5, participantenan a indica cu un averahe di 3.6 cu turismo tin un impacto positivo riba nan y nan famia. Entre 1 cu 5, participantenan a indica cu un averahe di 2.2 cu nan poder di compra pa e siguiente 12 lunanan a wordo afecta negativamente compara cu prome cu e pandemia.
E contestanan a wordo analisa tambe comparando diferente generacion cu otro. A puntra participantenan pa indica entre 1 cu 5 si nan isla ta demasiado dependiente di turismo. E average di mas abao kinan tawata di 4.42 pa ‘Baby Boomers’ y esun di mas halto di 4.70 pa ‘Gen Z’.
Pa loke ta trata e pregunta si participantenan ta sinti cu nan tin un stem den decisionnan di turismo riba nan isla, entre 1 cu 5, e average di mas abao tawata di 2.02 pa ‘Millenials’ y esun di mas halto 2.19 pa ‘Baby Boomers’.
A pidi participantenan comparti nan 3 preocupacionnan principal di turismo: 76% a indica e prijs halto y e costo di bida halto, 46% a indica daño na naturalesa y medio ambiente y 35% a indica vivienda inpagabel pa residente.
Tin mas informacion di e encuesta aki disponibel den A.T.A. su rapport di juli 2022. Si ta interesa pa ricibi e informacion aki por tuma contacto cu [email protected] .
A.T.A. kier gradici tur persona cu a yena e encuesta y a duna nan opinion. Un danki special na e ekipo di ‘Strategy, Planning and Research’ y na drs. Yolanda Richardson y e 5 studiantenan di e programa OGM na Universidad Aruba di Aruba cu a yuda asisti cu e coleccion di data.
ORANJESTAD - Den e prome kwartaal di 2024, por spera cifranan prometedor y solido pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA ta raporta diahuebs. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’.
ORANJESTAD – Diahuebs 14 di maart, Minister di Turismo y Salud Publico Sr. Dangui Oduber a ricibi un invitacion pa bishita Aruba Boutique and Art Hotel cu lo habri nan porta dia 1 di April 2024. Un boutique hotel nobo den curason di Palm Beach cu lo forma parti como miembro di e marca Best Western Signature Collection.
ORANJESTAD – Diaranson mainta 27 di maart Prome Minister Evelyn Wever-Croes hunto cu colega Minister di Finansa Xiomara Maduro a biaha pa Corsou pa reunionan importante den cuadro di e tema di ENNIA.
MIAMI – E compania hotelero Four Seasons awor tambe ta sigui e trend di e compania Ritz-Carlton cu a inicia cu nan coleccion di yate luhoso estilo crucero. E compania a anuncia cu nan tambe ta drenta den e negoshi ey, di ‘espacio di crucero luhoso ultra chikito, cu su prome yate den construccion na Italia. E prome destinacionan ta conoci y ta pa Caribe, cuminsando na 2026. E temporada Caribense lo core di januari pa maart 2026 cu parada na St Barth, Nevis, the Grenadines, Saint Lucia, Barbados, Martinique, Curacao, Aruba y Guadeloupe. Cada bapor lo tin solamente 95 suites, cu ta 50% mas espacio pa persona cu cualkier otro crucero. Cada camber lo tin bentanan gigante di vloer te plafond, hopi vanidad den e bañonan y terras priva. Asina e presidente y CEO di Four Seasons Alejandro Reyna a sigura.
ORANJESTAD – CEO di Aruba Hotel & Tourism Association Tisa LaSorte, recientemente durante e programa Noticiacla LIVE a pidi pa hende na Aruba no bay protesta contra turista na Aruba riba e desaroyo di turismo. Den e video, e ta splica e peticion mas amplio.