Feria social a cuminsa den fin di siman

ORANJESTAD - Diasabra atardi riba Eagle Beach a duna inicio na e prome Projecto Nacional di participacion di hobenan na 20 Fundacionan aki na Aruba a inicia. Mas di 100 hoben registra na e prome Feria Social. "Sigur un dia importante pa nos hobenan, pa e sector social y tambe partnernan comercial. Hobenan cu a base boluntario a scoge pa awe, en bes di hasi algo distinto, educa nan mes mas den e sector social di Aruba. Nos hobenan hopi biaha ta wordo poni den lus negativo y ta haya tur exposure ora di esaki, awe nos mester duna elogio na cada un di e hobenan cu a base boluntario a dicidi den hasi algo hopi positivo pa nan pais", Minister Paul Croes a reitera. 20 Fundacion pa 3 luna largo lo guia e hobenan aki, pa conoce nan clientenan, nan trabounan y tambe conoce mas di e tema cu e fundacionan ta dedica nan mes na dje. Cada un di e Fundacionan aki lo recibi un suma di 15.000 florin (na material of financiero) pa asina realisa un projecto pa nan Fundacion. Un total di 300.000 florin esaki ta nifica. E evento importante aki ta organisa pa Minister Paul Croes di asuntonan Social, Hubentud y Labor, CEDE Aruba y un Team Feria Social cu ta encarga cu e evento aki y cu ta consisti di hobenan dinamico bou di guia di sra. Joyce Bartels-Daal. Sr. Daniel Tackelenborg director di CEDE tambe ta reconoce e importancia di e projecto aki cu lo mester bira algo structural y duradero. Minister Paul Croes a gradici tambe tur e fundacionan y nan dirigentenan presente pa apoya e Feria Social for di prome instante y kier mira e projecto aki sigui crece den un forma duradero. Tambe na cada uno di e partnernan comercial cu a dicidi di apoya e Feria Social mirando e importancia di e projecto aki. "Forsa di e projecto aki ta e sinergia entre Gobierno, Fundacionan, hobenan y sector comercial. Nos hobenan lo educa nan mes mas den e sector social di nos pais, y ta spera di por planta e semiya social den nan curason",