Gobierno no ta paga reparatietoeslag fin di e luna aki manera cu sindicato a exigi

ORANJESTAD – Contrario na e exigencia di 5 sindicato, Gobierno di Aruba lo no cumpli cu e exigencia di paga reparatietoeslag fin di luna di augustus awor. Segun e mandatario, e palabracion ta cu pa aña 2022, Gobierno a presupuesta pa paga 5% y pa aña 2023 lo paga e resto esta 7.6% cu ta inclui e toelage di augustus tambe. Esey ta nifica cu e fin di luna aki e pago no ta tuma lugar manera cu e sindicatonan a exigi.

RIPITICION 

Prome Minister Evelyn Wever-Croes den e carta a ripiti locual dia 14 di juli a splica sindicatonan extensamente den un reunion. Prome Minister a splica nan cu Gobierno lo bay haci tur posibel pa paga e 5% pa 2022 y e 7.6% pa otro aña. Sindicatonan a haci pregunta riba con Gobierno lo haci e pago y tawata tin intercambio di idea y sugerencianan. Sindicatonan e expresa con importante e suma aki ta pa e empleadonan y den nomber di Gobierno, Minister President a compromete di percura cu e 5% wordo paga na fin di juli, cual el a cumpli cu ne tambe; y e restante 7.6% lo wordo paga den 2023.

SUMA

Prome Minister a enfatisa cu e 5% cu a presupuesta pa juli 2022, ta un suma di 10.7 miyon florin pa ambtenaar y pa e ‘gelijkgestelden’. Y pa esnan cu ta traha pa fundacionnan cu ta wordo subsidia pa gobierno, e suma total ta 7.5 miyon florin. Esaki ta un total di 18.2 miyon florin. Den contesta di Gobierno na e sindicatonan, a remarca tambe cu e pago di e 5% aki, no a bay facil. A tuma hopi esfuerso y contratiempo pa realisa e pago aki y te ainda tin discusionnan cu Hulanda riba e tema aki. 

RECUPERACION DI TURISMO

Den e carta cu sindicatonan a manda, nan ta menciona cu turismo ta recuperando. Prome Minister a indica cu di berdad turismo ta recuperando na un forma hopi importante pero pa e aña aki turismo ainda no a yega na e nivel di prome cu e pandemia. E proyeccion di cifranan ta indica cu turismo lo recupera completamente comienso di 2023. Economia lo recupera den curso di 2023 pa 2024. Y despues di esaki, finansas publico di Gobierno lo ta recupera. Cu esaki sinembargo, e mandatario ta contradeci su propio colega di turismo Dangui Oduber y oficina di turismo cu e mesun diabierna ainda (awe noticiacla ta produci esaki tambe), a bisa cu turismo di Aruba a surpasa esun di 2019 cu ta e nivel prome cu pandemia. 

PRESUPUESTO

Prome Minister a duna di conoce cu e presupuesto cu Parlamento a aproba pa e aña aki, tin un deficit di 227 miyon florin. Esaki combina cu un debe di como 6 biyon florin, no ta duna espacio aworaki, pa banda di e 5% cu a wordo paga fin di juli, duna e reparatietoeslag di augustus tambe completo. 

COMPRENSION 

“Mescos cu mi a splica e sindicatonan dia 14 di juli, mi ta spera di por conta riba nan comprension un biaha mas pa nos sigui cu e trayecto manera indica”, Prome Minister a finalisa bisando.

.