Parke Solar na aeropuerto ta cla

ORANJESTAD – E Parke Solar na Aeropuerto International Reina Beatrix ta cla. E di dos fase riba e parkeerplaats a culmina. E sistema ta genera 3.6 MegaWatt di electricidad pa medio di 14 mil panel solar contecta di manera moderno cu ta integra den e red di coriente di nos isla. E produccion aki ta ekivalente na e consumo di 2.500 cas na Aruba y ta hacie e proyecto di mas grandi den su forma pa loke ta area di Caribe.

Diabierna ultimo Premier Eman den su calidad di Minister di Ciencia, Innovacion y Desaroyo Duradero hunto cu Minister di Energia Mike de Meza a realisa un recorido den e facilidad den compania di Fons van Pul, director di Pfixx Solar Systems y inversionista local Milton Harms. Na final, e mandatario a expresa su satisfaccion pa mira con parti di e vision di sostenibilidad total pa Aruba ta conoce un avance mas.

En berdad, e instalacion na Aruba, como por ehempel esun na aeropuerto, no ta hopi grandi compara cu otro paisnan, pero si por bisa cu na Aruba ta logra completa y esey ta loke ta importante, e resultado final. E hecho cu Aruba ta mustra ta cu e ta importante no solamente pa Aruba, pero pa stimula otro paisnan. Esey ta algo cu nos representantenan ta wak cada bes den encuentronan internacional. Aruba ta wordo poni como ehempel central pa kere den un vision y cana e caminda aki.