Merca kier confisca avion di carga Venezolano cu a bishita Aruba recientemente tambe

BUENOS AIRES  — Departamento di Husticia Mericano kier confisca e avion di carga Venezolano cu recientemente tabata na Aruba, y cu Aruba tambe a prohibi di aterisa ‘te proximo aviso’. E avion despues di a bishita Aruba pa transporta un cargamento di cigaria, a keda pega na Argentina, pasobra e tabata propietario di un aeroliña Irani cu lo tabatin vinculo cu gruponan terorista. De hecho, e avion door di bula varios ruta menciona, a viola un sancion impone pa Merca. Merca como tal awor a pidi Argentina pa confisca e avion riba nan peticion. Un dia prome un hues Argentino a permiti 12 di e 19 tripulatenan pa bandona e pais, mientras cu autoridad ta sigui investiga e posibel vinculo terorista di esnan cu tabata bula e avion tipo Boeing 747. E restante di e tripulacion, 4 Irani y tres Venezolano a keda obliga pa keda. 

ARUBA

Tabata mitar di juni ultimo cu Gobierno di Aruba a anuncia cu temporalmente ta stop e avion encuestion di e compania Emtrasur di aterisa na Aruba. Gobierno a sigui informa di a tuma nota di publicacionnan tocante un vuelo recien di e compania Emtrasur pa Argentina. E compania aki tambe a efectua un vuelo di carga pa Aruba for di Paraguay, dia 16 di mei 2022, pa trece un cargacion grandi di cigaria. E hecho cu e avion tabata carga un tripulacion internacional dudoso y cu un avion sanciona, a crea un problema internacional, unda cu na Paraguay tambe gobierno eynan a tuma medida pa loke a sosode.  

VINCULO TERORISTA

Segun Merca mientrastanto, e avion aki a wordo transferi di e aeroliña Irani Mahan Air,- cu tabata provee sosten pa e Guardia Revolucionario Quds -, pa e aeroliña actual esta Emtrasur cu ta un subsidiario di e compania estatal Venezolano Conviasa. E avion lo ta bou di sancion Mericano.  Door di transferi e avion pa e compania Venezolano na October ultimo sin permiso di Merca, Mahan Air a viola un orden di 2008 pa departamento di comercio Mericano, cu ta e sancion actual cu ta wordo renoba anualmente.