Global Finance: Aruba tabata entre e 50 paisnan mas rico di mundo na 2021

MIAMI – Aruba na 2021 tabata entre e 50 paisnan mas rico di mundo, segun calculacion di e portal Global Finances. Asina e portal ta recorda den un articulo e siman aki, y ta referi na un publicacion anterior di aña pasa. Y nan ta basa nan mes riba entre otro e Producto Interno Bruto (PIB) di e pais. Mas specifico, Aruba ta figura na number 47, riba paisnan mas grandi manera Chile, Panama y Argentina. E pais considera mas rico, ta Luxemburgo sigui pa Irlandia y Singapore. E portal ta raporta si cu ta ahusta e PIB, pa e poder relative di compra pa duna un idea di e situacion, aunke no ta e forma mas ‘perfecto’ pa calcula esaki. Producto Interno Bruto ta un forma macroeconomico cu ta expresa e balor monetario di e produccion di beines y servicio d e demanda final di un pais of regio durante un periodo determina, mas tanto di un aña of un trimester. Interesante ta cu e calculacion asina ta pone cu tin paisnan mas chikito cu ta mas rico cu un pais mas grandi. E portal ta raporta cu si bo simplemete considera e  producto interno bruto d un pais,  e total di tur ‘goederen en diensten’ di un pais durante un aña, e ora mester conclui cu e paisnan mas rico ta exactamente esan cu tin e PIB mas grandi, cu ta e.o. Merca, China, Japon, y Alemania. Pero, con e economia di un pais manera Singapore of Luxemburgo match esnan poderoso si nan no ta mas grandi cu un punta chikito riba e mapa mundial? Un otr problema cu e PIB ta cu e no ta midi e reparticion di e rikesa. “Pesey ta mas miho, segun e portal, pa midi e representacion di e condicionan di biba di persona, cuminsando na dividi e PIB cu e cantidad di persona cu ta biba na e pais. E per capita PIB y su grado di crecemento ta bisa nos mas di e rikesa social potencial disponible pa cada persona y si e rikesa aki ta aumenta of disminui den curso di tempo”, e articulo ta sigui bisa. Pa lesa e articulo original, click AKI.