Kamilah Dammers y Renze Postma 'Atletanan di Aña 2014'

ORANJESTAD - Kamilah Dammers y Renze Postma un biaha mas a bira Atletanan di Aña 2014 di Aruba. Diabierna anochi un bes mas a honra nos atletanan cu a destaca den e aña deportivo 2014. Den un sala di Aruba Marriot Stellaris Casino completamente yen di atleta y nan famia, como tambe dirigentenan y invitadonan di honor a otorga e Premio Excelencia den Deporte na esnan cu a sobresali den e aña deportivo 2014. Premio Excelencia den Deporte ta existi pa 12 aña y semper a sirbi como un muestra di gratitud, reconocimento, y estimulo cu ta duna na esnan cu a destaca den mundo di deporte. Cada federacion a nomina nan miho atletanan, esaki ta e manera di reconoce e trabou duro y e sacrificio cu cada atleta ta haci pa cada dia bira miho den nan deporte. Ta obvio cu e atleta aki ta logra triunfa den eventonan deportivo local y internacional y mas cu claro e federacion ta masha orguyoso di por nomina cada un di nan atletanan e anochi aki. Tur federacion di deporte y nan miembronan ta traha duro na bienestar di e deporte y su atleta. Un mas cu otro a logra acapara gran atencion unda e deporte ta sigui crece y logra bon resultado na final, cual tambe ta e meta di tur federacion.

Na inicio di e evento a tene un minut di silencio na honor na e gran deportista Chinto Werleman, awe den felis memoria. Despues a toka e tono glorioso Aruba Dushi Tera canta pa e artista Arubano, Roderick “Rocco” Franken. Tanto Presidente di Comision, Sr. Wilfario Willems y su excelencia Minister di Hubentud, drs. Paul Croes tabata tin palabranan elocuente pa e sacrificio di tur dia cu e atleta, dirigente, entrenador y mayornan ta haci pa nos deporte mientras e presencia di nos bandera ta bisto internacionalmente. Mester sigui apoya cada un, e unico manera pa nos sigui mantene e desaroyo positivo den deporte.

E aña aki mas cu 101 atleta a wordo nomina pa e 25 federacionnan deportivo, cual sigur ta un record. Mescos cu aña pasa a reconoce tambe e dos atletanan di Special Olympics Aruba cu mas a destaca den e aña deportivo 2014. E aña aki tambe Comision Premio Excelencia den Deporte a honra dirigente y ex-atletanan cu den pasado a logra cosnan grandi den deporte pa Aruba y no por a keda sin duna na cada un, e merecido reconocimento. Acerca a bini tambe e reconocimento na nos alumnonan y nan scolnan esaki den cooperacion cu IBiSA. Aki a duna premio na e diferente scolnan basico y avansa cu mas a destaca riba e tereno di Deporte Escolar como tambe Weganan Interinsular.

E dos atletanan di Special Olympics Aruba kendenan a haya nan premio como e miho dos atletanan den 2014 ta Dairylis Geerman cu e destaca den e deporte di Bollas Crioyas como tambe Jeffrey Croes cu a destaca den e deporte di atletismo.

E dirigente y ex-atletanan cu a wordo honra e anochi aki ta Sr. Mario Croes pa su gran logronan den e deporte di tenis di mesa, Sr. Harry Janssen pa su añanan di contribucion y dedicacion na e deporte di atletismo, Sra. Lies Bisslik pa su logronan den e deporte volleyball, Sr. Octavio Croes pa su añanan di contribucion y dedicacion na deporte di ahedrez y dammen, Sr. Octavio Woodley pa su añanan di contribucion y dedicacion na e deporte di volleyball, Sr. Marcelo Croes pa su añanan di contribucion y dedicacion na e deporte di futbol, Sra. Shariska Winderdal pa tur su gran logronan den e deporte di coremento riba distancia largo, Sra. Sherry Howell pa tur su gran logronan den e deporte di atletismo y softbol y Sr. Juan “Capan” Tromp pa tur su gran logronan den e deporte di basketball. Tambe e organisacion di Solito, e tricolornan Racing Club Aruba(RCA) a ricibi un reconocimento pa nan 80 aña di existencia.

E scolnan cu a haya e premio escolar tabata Colegio St. Anna di Noord y Maria College Mavo a ricibi nan premio como e dos scolnan mas activo, Lucienne Morillo di Colegio Laura Wernet Paskel a ricibi e premio como e MVP di e Weganan Interinsular mientras cu Jesus Penate di Colegio San Antonio tambe a ricibi su premio como e MVP di dicho weganan ya menciona. Mester bisa cu tres hoben cu a gana medaya di oro den e Weganan Interinsular tambe a haya un premio special esakinan tabata Tyrese Brown di Paulus School, Valerie Hernandez di Commandeur Pieter Boer School y Evander Nedd di Pius X School. Por ultimo a entrega un premio na e campeonnan di Weganan Interinsular esta Colegio San Nicolas den e deporte di volleyball femenino y Colegio San Antonio den e deporte di futbol di sala masculino.

Siguientemente nos ta presenta tur e ganadonan den Premio Excelencia den Deporte 2014.

Deportista infantil femenino te cu 13 aña: Melanie Wever di Organisacion Caballista Arubano

Deportista infantil masculino te cu 13 aña: Brandon Cheong di Arubaanse Zwembond(landamento)

Deportista hubenil femenino 14 te cu 18 aña: Kyra Hoevertsz di Arubaanse Zwembond(synchro)

Deportista hubenil masculino 14 te cu 18 aña: Renze Postma di Aruba Triathlon Association

Prospecto deportivo femenino: Rebecca Maduro di Arubaanse Zwembond(landamento)

Prospecto deportivo masculino: Patrick Groters di Arubaanse Zwembond(landamento)

Ekipo di Aña 2014: Team Kamilah Dammers y Thashiana Seraus di Bowling, ARBAS

Atleta di Aña Local 2014: Renze Postma di Aruba Triathlon Association

Atleta di Aña Internacional 2014: Kamilah Dammers di Bowling, ARBAS

Un palabra di pabien na cada un di e nominadonan den Premio Excelencia den Deporte 2014, tur tabata ganado e anochi aki. Un danki special ta bay na e dos MC-nan, Cheraldine Buckley y Maximo Wernet, sin lubida Brazil Taekwondo Stichting, Team Films, High Performance, Endy Croes y Carl Ludwig Quandt, personal di Marriot Hotel y tur e otro boluntarionan cu a haci e anochi aki uno inolvidabel.