Maestronan kier ‘feitenonderzoek’ pa caso di scol Kudawecha

ORANJESTAD – Un grupo di por lo menos 14 maestro di Scol Primario Kudawecha ta protesta e suspension di nan colega Sugail “Suki” Croes serca hefe di Dienst Publieke Scholen (DPS), sr. Kock. Den un carta (lesa e carta aki), nan ta mustra na desacuerdo e.o. cu e suspension di e colega maestra, y ta pidi contesta riba varios pregunta.

LAMENTO

Nan ta lamenta cu e maestra concerni a bira victima di un mayor, cu ‘aparentemente lo kier tuma e enseñansa over’. ‘Awor Sugail ta e victima, pero e por ta un di nos tambe.

COMBERSACIONAN

Nan ta conciente cu nan no tabata presente na e combersacionnan relaciona cu e caso, pero asina mes ta considera cu e medidanan tuma, ta fuera di proporcion. Nan ta mustra cu nan mes tin experiencia negativo cu e tata, ken nan ta yama C.Croes. Mientras cu Sugail lo tin algo di culpa, pero e loke cu Croes a haci, door di entre otro asumi un posicion intimidante y provocativo, no ta corecto.

IMPARCIALIDAD

Ademas e grupo di maestro ta duda di e imparcialidad di esnan envolvi den e caso, mirando e relacion serca cu e tata, sr. Croes, tin cu e minister actual di enseñansa, Michelle Hooyboer Winklaar.

FEITENONDERZOEK

Como tal a pidi pa di un forma urgente, conduci un ‘feitenonderzoek’ den cual nan tambe kier wordo scucha, y a base di e informacion, yega na un tipo di decision. “Como maestronan di enseñansa basico na Aruba, nos ta sinti nos hopi vulnerable y insigur. Nunca bo ta sigur di bo trabou como maestro’ e grupo di maestro a sigui bisa den e carta.

PREGUNTA

Den e carta nan ta haci como 5 pregunta cu nan kier contesta ariba. Nan ta varia di e hecho si maestronan tin derecho, a base di kico a tuma decision contra maestra, y ken ta esun cu a dicidi pa tuma e medidanan tuma.