Quick scan: Presupuesto 2014 ta irealistico e incompleto!

DEN HAAG /ORANJESTAD – E mensahe tabata cla :  Presupuesto 2014 di Aruba ta irealistico, e incompleto y no mag ta laat mas. De hecho, e no a desvia di e consehonan di entre otro Raad van Advies y otro organonan di Aruba. Ayera merdia NoticiaCla a haya e documentonan den su poder, cu ta e quick scan, e carta di gobernador na minister Plasterk y tambe e tussenrapport. Resumiendo e quick scan mes, a pone por lo menos 6 punto cu e presupuesto tin cu tene cuenta cune, pa Aruba por tene su cabes riba awa financieramente. Solamente cu e compromiso aki, gobierno di Aruba por logra esaki.

Pa cuminsa, gobierno mester introduci un pakete di medida convincente y necesario. E presupuesto no ta completo, no ta cla, no por wordo realisa realisticamente pasobra hopi di e leynan pa haci esaki, no ta ni traha. Hopi di e partinan di presupuesto no ta completo, (ripiticion varios biaha den e documento), y no ta cuadra cu e realidad (tambe ta wordo ripiti constantemente).

E maneho di finanzas no ta na ordo, y ta hopi dificil pa haya un bista riba henter e cuadro financiero. No ta bisa si ta pasobra gobierno no kier a duna un bista riba e cifranan, of si cu e cifranan mes, no tabatin un bista riba e plachi financiero. Y tambe e ta papia cu no tabatin un asina yama ‘meerjarenraming’ cu ta cuadra, te pa tine mes.

Loke a hala atencion ta e practica di presenta presupuesto laat ultimo añanan. Kico cu e rason por ta, gobierno tin cu bay mira con ta haci pa e presupuesto 2015 keda cla na tempo, y pa e drenta den funcion 1 di januari di e aña corecto. E asunto di traha presupuesto laat, y durante curso di aña, keda cla cune manera a bin ta haci ultimo tempo, no mag sosode mas. Gobierno tin cu tuma e pasonan necesario pa remedia esaki y tin cu cuminsa cu e parti di presupuesto 2015. Esaki tabata mas bien un 'quick scan' di e quick scan. Den curso di dia lo tin un reportahe mas extenso riba e informe aki.