Turista ta bolter cu jeep y fayece na e sitio

SHETE – Un turista a bira e di 3 morto den trafico pa Aruba pa e aña aki. Awe diasabra pa mas e menos 4'or y 15 a drenta un informe cu un jeep lo a bolter riba e caminda pa bay Shete y cu tin un persona seriamente herida. Mesora a manda varios patruya y ambulance na e sitio. Na yegada nan a bin compronde cu ta trata di un jeep di ABC Tours cu tabata riba un tour bayendo Conchi. Den e jeep tabata tin 5 dama turista. E chauffeur pa un of otro motibo a hala na su man drechi, subi un sero di baranca. Esaki a pone e jeep a bolter, sacando e ocupantenan for di den e jeep. Un di e ocupantenan a keda seriamente herida y no tabata duna señal di bida. Personal di ambulance a haci tur nan esfuerzo pa yuda e dama pero tabata laat, e dama a fayece a consecuencia di e slanan grave cu e la ricibi. E la kibra un brasa, haya varios sla na cabes. Pa 5'or y 45 dr. Lin a constata morto di e dama turista di 46 aña cu tabata kedando na Palm Beach Villas. NoticiaCla.com ta manda palabra di condolencia na famianan.