Minister a acorda ahustacion di tarifa pa autobus cu 1 florin

Minister a acorda ahustacion di tarifa pa autobus cu 1 florin

Posted on 07/28/2022 4:03 pm AST | Updated on 07/28/2022 4:07 pm AST

ORANJESTAD – Chauffeurnan di autobus a logra nan meta. Diaranson   minister di transporte Sr. Ursell Arends a reuni cu chauffeurnan di Autobus Uni. Den deliberacion cu otro Minister?Ursell Arends a duna di conoce cu Gobierno di Aruba y Autobus Uni a yega na otro den un acuerdo cual ambos partido por ta contento cun’e. 

Pa e acuerdo nobo logra entre Gobierno di Aruba y Chauffeurnan Autobus Uni, a tene na consideracion cu e ultimo biaha cu a haci ahustacion, tabata na 2015. E tarifa standard lo aumenta cu AFL 1.00. Importante pa nota cu e tarifa pa Adultonan Mayor lo keda fiho na AFL 3.00. 

Minister Arends a bisa di ta compronde cu e situacion ya pa algun tempo caba tabata preta financieramente pa e operadornan di autobus. Cu e aumento drastico di prijs di combustibel a caba di pusha e grupo aki ‘den cora’. Minister Arends tabata na altura di e situacion, y na prome instante a acerca Universidad di Aruba pa haci un estudio riba e capacidad di carga pa asina bin cu proposicionnan pa cambio di maneho, incluso tarifa, cantidad di permiso etc. Te ainda ta pendiente pa e resultadonan di e estudio aki, cual ta plania pa conclui na september 2022. 

Ta importante pa nota cu awo ta bai cuminsa encamina e proceso legal. Pues e speculacion di desde ki tempo e tarifa nobo lo ser efectua, na e momento aki, no por ser funda. Minister Arends a duna di conoce cu lo pone prioridad pa encamina e proceso mas eficiente posibel, y lo tene e grupo di chauffeur y comunidad na altura di e desaroyonan.

Minister Arends ta gradici Chauffeurnan Autobus Uni pa e forma cu nan a organisa nan mes, pa e forma cu a hiba e deliberacionnan, y tambe pa e cooperacion y comprencion pa mantene e tarifa sin cambia – mas faborabel – pa nos adultonan mayor. “Esaki ta demostra cu ora nos delibera cu respet y profesionalismo, nos por logra metanan comun cu por beneficia nos comunidad”, e mandatario a comenta.

  • Maduro: Gobierno lo no cobra impuesto riba tips

    Maduro: Gobierno lo no cobra impuesto riba tips

    ORANJESTAD – Minister di Finanza Xiomara Maduro diamars anochi riba su pagina di Facebook a pone cu gobierno a dicidi cu no ta bay cobra impuesto riba tips. “E proposicion final pa Reforma Fiscal ta consisti di varios cambio y den esaki no tin cobransa di impuesto riba tips” e mandatario a bisa. “Tin varios punto cu tabata poni den e promer proposicion cu awor aki no ta aden mas y cobransa riba tips ta un di nan. E proposicion final ta wordo anuncia e luna aki” e la sigui bisa. Prome cu esey, tabatin hopi discusion riba e tema aki y ayera e mandatario a dicidi di papia y bisa kico ta kico. 

  • Prijs di gasolin y diesel na Aruba lo baha considerablemente diaranson

    Prijs di gasolin y diesel na Aruba lo baha considerablemente diaranson

    ORANJESTAD – Un dia prome cu e tempo usual, Gobierno dialuna mainta a anuncia un reduccion considerable di prijs di tanto gasolin y diesel entrante 10 di augustus 2022, valido pa 4 siman. Tabata minister di Economia Geoffrey Wever cu a anuncia awe dialuna mainta durante un conferencia di prensa cu entrante diaranson awor, e prijs di gasolin y diesel lo conoce un reduccion di 42.5 cen y 32.2 cen respectivamente. Pa gasolin, esaki ta nifica cu e prijs di gasolin y diesel lo bira AWG 2.93 y AWG 2.78 respectivamente cu ta 12.7% y 10.9%. Esaki ta un reduccion considerable, compara cu e lunan anterior unda cu a conoce varios aumento considerable. E diferencia e biaha aki ta cu normalmente ta haci e anuncio aki e di dos diamars di luna, vigente pa e siguiente dia valido pa e proximo 4 siman. 

  • Gobierno no ta paga reparatietoeslag fin di e luna aki manera cu sindicato a exigi

    Gobierno no ta paga reparatietoeslag fin di e luna aki manera cu sindicato a exigi

    ORANJESTAD – Contrario na e exigencia di 5 sindicato, Gobierno di Aruba lo no cumpli cu e exigencia di paga reparatietoeslag fin di luna di augustus awor. Segun e mandatario, e palabracion ta cu pa aña 2022, Gobierno a presupuesta pa paga 5% y pa aña 2023 lo paga e resto esta 7.6% cu ta inclui e toelage di augustus tambe. Esey ta nifica cu e fin di luna aki e pago no ta tuma lugar manera cu e sindicatonan a exigi.

  • Enseñansa pa Empleo pronto lo bira un departamento oficial di Gobierno

    Enseñansa pa Empleo pronto lo bira un departamento oficial di Gobierno

    ORANJESTAD - Recientemente Gobierno di Aruba a apunta un ‘kwartiermaker’ pa Enseñansa pa Empleo den persona di Sra. Sabine de Groot. De Groot tabata encarga cu e proyecto di FASE ultimo dos añanan. EPE a inicia como un Proyecto na 1988 ora cu LAGO a cera. Hopi hende a keda desemplea, pa  cual motibo a inicia cu e proyecto di recapacitacion di nos hendenan pa por yega na un trabou nobo, diferente di locual cu nan tabata custumbra na dje.

  • Minister Croes: Ta apoya peticion di sindicatonan pa reevalua aumento di tarifa di utilidad

    Minister Croes: Ta apoya peticion di sindicatonan pa reevalua aumento di tarifa di utilidad

    ORANJESTAD – Minister Glenbert Croes a bisa 4 sindicato y OPPA durante un reunion diamars mainta cu e ta sostene e peticion di sindicatonan pa reevalua e aumento di tarifa di utilidad manera recien anuncia. Tabata awe diamars mainta cu minister Glenbert a reuni cu sindicatonan hunto cu WEB, ELMAR y Utilities riba e ahuste recien di prijs di awa y coriente.

  • Oduber: Aruba su recuperacion di turismo ta entre e mihonan di mundo

    Oduber: Aruba su recuperacion di turismo ta entre e mihonan di mundo

    ORANJESTAD - Aruba su recuperacion di turismo ta excepcional y entre e mihornan di mundo henter. Asina minister di turismo Dangui Oduber a sigura durante un conferencia di prensa dialuna mainta. Segun e mandatario, pa e promer 6 lunanan di anja 2022 Aruba a ricibi 528.325 turista. “Esaki ta un recuperacion di 92%! Aruba su recuperacion di turismo pa 2022 te cu awor ta 92% (-8%), cual ta hopi bon! Un di e mihornan di mundo” e mandatario a cuminsa na bisa.  “Recuperacion mundial ta 46% (-54%).  Recuperacion den nos parti di mundo ta 60% (-40%). Esaki ta confirma nos curashi y determinacion pa anuncia nos “exit strategy den  pleno pandemia na januari 2022. Turistanan tawata sinti nan mes safe y sigur cu Aruba su protocolnan Manera IMF a senjala: “Aruba moved very swiftly from the pandemic”. Awe Aruba ta e di dos pais na mundo cu mihor recuperacion di turismo” e mandatario a finalisa bisa

  • Powered by SETAR