Corte: Mester conecta coriente bek pa Reflections Beach Bar and Restaurant

ORANJESTAD – E compania Navarra Properties NV tin 48 ora pa reestablece e coneccion di coriente pa e negoshi Dontom Horeca NV miho conoci como Reflections Beach Bar and Restaurant na Surfside. Asina Corte a dicta diaranson den un setencia adelanta. Mientras cu e disputa entre e compania cu ta opera e negoshi y e compania cu ta doño di e tereno ta andando, Corte a dicta cu e e compania cu a corta e coriente algun siman atras di e restaurant, mester pone esaki bek y cu gobierno (pais Aruba cu ta doño di e tereno) mester permiti Elmar pa conecta esaki. A impone un multa tambe pa tanto gobierno como e compania cu a laga kita e coriente, si nan no cumpli cu esaki. 

DISPUTA

E disputa legal ta andando for di 2015 ora cu e compania cu ta opera e restaurant, a bin compronde cu e compania di cual nan a cumpra e facilidad, no ta e doño, sino gobierno. Aki e discusion a cuminsa entre e partidonan unda cu e company Dontom den un intento pa coregi e situacion, a cuminsa e proceso pa paga e doño corecto pa por sigui opera e lugar. Pero e disputa a sigui y a yega na tal extremo cu e aña aki e compania cu ta sigura cu e ta doño di e tereno, a menasa cu kita coriente di e lugar, cual a tuma lugar algun siman pasa. Esey a pone cu e lugar mester a cera su porta debi cu e no por a sigui opera sin coriente. A pidi un suma di daño di perhuicio di riba 200 mil florin. Huez a otorga un Adelanto di casi 16 mil florin pa esaki. Lesa e sentencia AKI.