E presentacion di RCC Aruba den AGT a haya atencion internacional inmenso

LOS ANGELES/ORANJESTAD – Pa 6 minuut diamars anochi, mundo a haya chens di conoce 7 acrobata internacional representando Aruba y cu esaki, duna e isla un cobertura increibel grandi. Despues di varios siman di anticipacion, e grupo lidera pa Diego Fernando Jaramillo, a presenta nan acto riba e scenario di e show di talento mas popular na mundo, America’s Got Talent (AGT) na Los Angeles, y cu esaki, percura pa e nomber di Aruba resona rond mundo pa algun minuut, incluyendo di e huradonan popular Simon Cowell, Heidy Klum, Howie Mandell y Sovia Vergara. E grupo consistiendo di acrobatanan Cubano y Colombiano, ta yama Aruba nan cas pa varios aña, y como tal ta representa Aruba internacionalmente bou di e nomber ‘Rhythm Circus Company’, aunke nan ta wordo yama tambe ‘Ritmo Cubano Company Aruba (RCC Aruba). E acto a haya cobertura internacional den prensa e dia siguiente, incluyendo portalnan Chines y otro paisnan grandi. Noticiacla a conta por lo menos 10 mencion internacional diahuebs mainta, unda cu ta raporta riba e grupo aki. Esey ta traduci den cobertura internacional impagable, unda cu potret di e grupo cu e nomber Aruba imprimi ariba, sigur a haci un cos. 

PASADO

E grupo aki no ta exactamente desconoci ya cu nan tin hopi aña ta haci show di acrobacia na Aruba den varios hotel, y ultimo tempo ta biahando rond di mundo cu nan acto. Aña pasa nan a logra gana e di 3 premio na Hungria durante un festival internacional di Circo na Budapest, y e premio di publico. Na februari di e aña aki, gobierno di Aruba a reconoce e grupo aki pa su esfuerso pa tene Aruba su nomber na halto.

AGT

E show di talento Mericano, tambe a bira interesa den e grupo aki. E promotornan di e programa America Got Talent tambe a keda impresiona cu e presentacion di RCC Aruba y a invita e Grupo di artista pa presenta den AGT. Pa haci esaki tabata henter un proceso, ya cu RCC Aruba mester a haci dos presentacion prome y si nan pasa e presentacionnan aki, nan lo por haci e audicion di AGT. RCC Aruba a completa e presentacionnan cu exito y lo ta riba tarima internacional un bez mas promoviendo Aruba su nomber. Asina gobierno di Aruba a informa mas prome e aña aki. 

TEMPORADA NOBO

E show di diamars anochi tabata parti di e temporada 17, cu a haya su premiere dia 31 di mei ultimo. Cada acto ta haya 90 seconde pa mustra nan talent. Si e acto haya por lo menos 3 ‘si’ di hurado, nan ta sigui pa e siguiente buelta. E grupo aki a logra esaki y diamars anochi por a mira cu nan a haya nan siguiente 4 ‘Si’ cu a pone nan pasa pa e proximo buelta. Loke a hala atencion diamars anochi, ta e reaccion di un hurado particular, e actris di Baranquilla, Colombian di 50 aña Sofia Vergara ora cu e la lanta para asina cu e acto a cuminsa. Prome cu esey e la hala atencion di e participante Jaramillo, puntrando e pakico e no a cuminsa su storia cu nan ta di Colombia, ya cu e tambe ta procedente di eynan. Simon Cowell tambe a remarca pakico nan ta menciona Aruba si nan yama RCC. Esaki tabata e chens pa Jaramillo splica cu berdad nan nomber ta RCC pero cu nan ta representa Aruba. Un otro chens pa menciona e nomber di Aruba. Loke a hala atencion tambe ta e hecho cu e grupo a confronta retonan grandi djis pa yega nan destinacion cu tur nan props y cu a pone cu mester a bira creativo pa aunke cu hopi di nan material no a yega na tempo, a logra pone un show den otro di nivel internacional. 

REACCION LOCAL

Unabez cu e show a keda presenta, Arubianonan y otronan cu stima Aruba mesora a resona nan comentarionan positivo riba rednan social, felicitando e grupo aki pa nan presentacion, pa nan decision di aunke no ta Arubiano, a sa di promove e isla. Ademas Hopi a dicidi di comparti e video di e show rond, creando asina mas ‘views’ pa e grupo. Por a nota cu den algun rato, e video di e grupo a haya mas di 100 mil views rond di mundo. Click AKI pa wak e presentacion.