SKOA mes kier cabesante duna rapport pa evita problema legal!

ORANJESTAD – Pa evita cu e lo por ‘tin consecuencia huridico’ contra dje, Stichting Katholiek Onderwijs Aruba (SKOA) a manda un carta electronico pa tur cabesante di scol cu ta cay bou di dje. Den e carta, -cu a cay den man di NoticiaCla.com-, nan ta suplica e respectivo cabesantenan di scol, pa para e practica di tene rapport aden si mayornan no paga school geld. Mirando cu SKOA a acusa NoticiaCla.com recientemente di no ta papia berdad, NoticiaCla.com, e biaha aki, a inclui prueba.

E-MAIL COMO PRUEBA

Mientrastanto, e documento cu NoticiaCla.com a haya den su poder awor, ta papia palabra cla, esta cu SKOA mes tin e sospecho cu e practica aki ta tumando lugar na algun di su scolnan. Di otro forma lo no ta mandando e carta aki. Den un frase, (por lesa e carta completo aki), SKOA ta bisa “SKOA su responsabilidad y obligacion ta pa segura cu e practica aki no ta tumando lugar ‘mas’ den su scolnan.

PETICION NA CABESANTENAN

Ademas SKOA ta mustra cu durante un ultimo encuentro cu e cabesantenan, a informa ‘claramente’ cu nos dunador di trabou no ta aproba y ta prohibi e hecho cu tin cierto scolnan ta retene rapport pa falta di pago (principalmente esunnan di airco)’. SKOA ta sigui manda un mensahe directo pa e scolnan cu ta practicando esaki. “A enfatisa cu si bo persona ta hiba e practica aki den bo scol, pa percura cu esaki no sosode mas’ pasobra ‘ e practica aki lo por tin consecuencia huridico pa SKOA’.

APELACION FUERTE 

E carta pa cabesantenan ta sigui bisa cu mientras cu e mes ta ‘spera’ cu e comunicado di Noticiacla.com ta puramente basa riba speculacion, ‘pero cu si esaki no ta e caso, SKOA ta haci un apelacion urgente na bo persona pa extende e rapport na e mayornan di e alumnonan cu ainda tin un cuenta habri, mas pronto cu ta posibel’. Cu esaki SKOA mes ta indica cu e practica menciona, lo ta tumando lugar. Y finalmente, SKOA ta sigui bisa cu ‘SKOA no kier haya su mes confronta den un situacion fastioso (huridico) innecesariamente, djis debi na e hecho cu su cabesante(nan) no ta sigui instruccion di su (nan) dunador di trabou. E carta ta firma pa un ‘staf funcionario di SKOA’. NoticiaCla.com a tapa e nomber, pero tin e documento, si ainda tin duda cu no tin prueba.NOTA..

RECLAMO DI SKOA

Tabata e siman aki cu SKOA a manda un comunicado indicando cu e noticia cu NoticiaCla.com a trece cu e cabes “Si no paga school geld, cierto scol no ta duna rapport”, ‘ta informacion eroneo’. Tambe SKOA a bisa cu nan ta” desmenti categoricamente cu SKOA ta hiba e maneho cu si no paga school geld no ta entrega rapport na e alumno manera cu ta wordo anuncia den e comunicado di NoticiaCla’. Pero den e caso aki, ningun momento NoticiaCla.com a tilda SKOA di tin e maneho ey, sino cu ‘cierto scolnan no ta duna rapport’. Ademas, e minister di enseñansa, riba pregunta di NoticiaCla.com, tambe a bisa cu e la ‘haya e informacion aki, pa cual e la instrui e departamento di enseñansa pa investiga esaki’. Ademas varios mayor a presenta prueba kico a sosode cu nan scol. Y tambe un vespertino local a publica e noticia, usando aun mas prueba cu combersacionnan comprobante.  Foto cortesia ArienRasmijn.