Van Huffelen: Fuera di Aruba, Corsou y St Maarten tampoco a mantene acuerdo cu RMR

DEN HAAG – No ta Aruba so, sino Corsou y St Maarten tambe no a tene nan mes na e acuerdonan cu Rijks Ministerraad (RMR). Asina secretario di estado Hulandes Alexandra van Huffelen a raporta na Tweede Kamer e siman aki. Aruba diaranson a dicidi pa elimina 5% di e recorte di salario di trahadonan publico y a paga esaki contra aprobacion di Hulanda. Awor ta resulta cu Corsou y St Maarten tambe a haci mescos, ambos den nan mesun forma. Corsou a paga un suma di gratificacion mentras cu St Maarten a paga placa di salario. Tur tres isla ta viola asina e acuerdo cu RMR. Tur tres isla sinembargo ta sinti cu nan a haci lo corecto.

A WANTA SOSTEN DI LIKIDES PA ARUBA

Pa Aruba, van Huffelen ta sigui bisa, RMR a dicidi di wanta e suma di 4 miyon euro di sosten di likides, no obstante e conseho positivo di CAFt, pasobra e ta warda CAFt duna e conseho riba e cambionan den presupuesto, conforme articulo 11 inciso 5 di e ley di LAFt. 

AANWIJZING

Van Huffelen ta raporta tambe riba e aanwijzing cu CAFt a conseha RMR pa duna Aruba. Esaki sinembargo tin cu ward ate e proximo RMR  di dia 26 di augustus 2022. 

ACUERDO 

E mandatario Hulandes, pa clarifica cualkier duda, ta recorda e islanan cu desde di e otorgacion di e di 2 sosten di likides na 2020, a mara esaki na condicionan. Condicionan cu e tres islanan a firma pe. “Door di firma e acuerdo di fiansa aki pa sosten di likides, e paisnan (Aruba, Corsou y St Maarten), ta obliga pa mantene nan mes na e condicionan stipula pa RMR”, e mandatario ta sigui bisa. E islanan ta sigura cu nan a cumpli cu e condicionan, pues aki tin un impasse entre e islanan y Hulanda. 

PAGA BEK

Un punto tambe cu a resalta den e carta ta cu ta papia di e ayudo di sosten cu a wordo paga di mas na companianan riba e islanan (incluyendo Aruba). “Esakinan mester wordo paga bek y e islanan mster informa CAFt di esaki” van Huffelen ta sigui bisa. Pero aki tambe tin problema. “E raportahenan, e control y e resultado di e pagamento bek, ainda ta insuficiente”, van Huffelen ta finalisa bisando. Cu esaki, e mandatario ta confirma e puntonan di impasse cu tin aworaki entre e islanan menciona y Gobierno Hulandes. Lesa e documento completo AKI.