Gobierno ta hiba SKOA corte definitivamente!

ORANJESTAD – Gobierno di Aruba lo entama un caso contra Stichting Katholiek Onderwijs Aruba (SKOA) relaciona cu aumento drastico di school geld. E decision a cay awe despues cu e mandatario encarga cu enseñansa, Michelle Hooyboer-Winklaar, a haya e consehonan final legal. Segun su informacion, nan ta dune caminda legal pa cana. “Decision a cay, nos ta hiba SKOA corte” e mandatario a confirma na NoticiaCla.com awe merdia.

INTENCION DI BAY CORTE

Tabata un siman y mei pasa cu e mandatario a bisa cu e ta evaluando pa tuma paso legal contra  SKOA pa para e cobransa di e suma di 250 florin pa schoolgeld. "Un siman a pasa y mi no a haya reaccion di SKOA" e mandatario a bisa NoticiaCla.com e tempo ey. "Como tal mi ta evaluando ki paso legal por tuma pa para e aumento (di schoolgeld)" e mandatario a sigui bisa. Asina e mandatario ta reacciona despues di a duna SKOA un siman pa conteste bek y mande e cuentanan anual di 2011-2014 pa gobierno tira un bista ariba. Y e ultimatum a vence sin cu e mandatario a tende algo. Como tal awor, e tabata pensa di hiba nan corte. 

E ULTIMATUM

Un siman prome cu esey, e mandatario a bisa NoticiaCla.com cu e decision di Stichting Katholiek Onderwijs Aruba (SKOA) pa dal bay cu e cobransa di 250 florin pa schoolgeld pa e aña escolar nobo, no ta conta cu su aprobacion. NoticiaCla.com tabatin confirmacion cu un carta a bay di ministerio enseñansa  informando SKOA di su pensamento. Den e carta aki e mandatario ta indica na SKOA cu calculacion di gobierno ta mustra cu cobrando 250 florin pa alumno, ta genera mucho mas placa cu nan mester pa cubri e deficit menciona. Y ademas, ningun di e motibonan duna pa SKOA no por wordo motiva, pasobra ainda e fundacion no a entrega nan relato annual di 2011 pa 2014. Y na final, e mandatario a exigi pa SKOA entrega e relatonan menciona, dentro di un siman, esta awe. 

CARTA DI AUMENTO

Manera ta conoci, dia 2 di maart ultimo SKOA a manda un carta pa mayornan, indicando cu e fundacion lo sigui cu e cobransa di e suma di 250 florin (parti den dos biaha 125), no obstante cu a bisa e mandatario cu nan lo wanta e cobransa te ora cu un otro solucion ta posibel. Pero esey awor a resulta di no ta asina. E siman cu a pasa, SKOA a manda un carta pa e minister, como contesta riba esun cu e la manda pa nan. Den e carta cu minister a manda pa SKOA, tabatin e splicacion di e acionan di conseho di minister riba e asunto, incluyendo pagonan atrasa na SKOA etc.

AUMENTO TA SIGUI

Den e carta cu SKOA a contesta minister, nan ta confirma cu nan a ricibi e suma di 500.000, = florin (un verrekening di 2014), y e decision pa aumenta e subsidio di gobierno pa por cubri e gastonan di tur werkster. Sinembargo segun SKOA, segun nan calculacion, ta keda un buraco ainda di por lo menos 350.000,= den 2015 y como tal a dicidi cu ‘nan ta mantene nan plan pa aumenta e schoolgeld te na e suma di 250 florin’.

REACCION DI MINISTER

Y manera NoticiaCla.com a indica caba, e mandatario a contesta nan, cu e ‘no ta sostene e aumento’. De hecho, e calculacionnan cu e mandatario a haci, ta indica cu e aumento di 250 florin, lo genera un suma adicional di 1.6 miyon florin pa SKOA, cual ta surpasa nan ‘deficit’ di 350.000 florin cu 1.250.000,=. Pues ta cobrando demasiado. Y como tal minister no ta di acuerdo cu  esaki. No ta conoci pues, kico lo pasa si SKOA no duna oido na e exigencia di e mandatario. Manera ta conoci, SKOA ta independiente y no ta cay bou di gobierno, cu excepcion di e subsidio cu nan ta ricibi. Pues gobierno ‘no tin grip’ riba kico SKOA ta haci. Algo cu pa gobierno ta frustrante pasobra mientras cu esey ta e realidad, gobierno tin cu subsidia e fundacion si.