Croes: Aruba ta haya operacion completo bek di Lotto pa Deporte

ORANJESTAD – Lotto pa deporte ta di Aruba bek. Asina minister di deporte Endy Croes dialuna mainta a habri su conferencia anticipa. E tema tabata solamente cu lo a anuncia algo grandi y historico pa Aruba. A resulta cu esaki a bira cu Gobierno di Aruba a logra cambia e contracto entre Lotto pa deporte y e compania Canadez Canadian Bank Note, den un forma cu Aruba ta haya e operacion bek den su man. Asina minister di deporte Endy Croes a anuncia dialuna mainta den un conferencia di prensa. E mandatario a splica cu esaki kier men cu envez cu e compania Canades ta encarga cu e operacion di lotto, esaki lo pasa bek den man di Aruba atrobe. Hunto cu esaki, e porcentahe di placa cu ta bay pa e compania Canades, ta bay bek na loke e tabata anteriormente (prome cu 2011). 

NEGOSACION

E mandatario a splica cu den negosacion duro pero husto siman pasa, a logra ‘bolter’ e contracto cu a keda cambia na 2011 (cu valides te 2035) , pa e beneficia Aruba mas atrobe. E contracto original cu e compania ta data for di 1999, unda cu Aruba lo mester a manda 8.25% di e ganashi bruto, pa Canada pa cubri e gastonan technologico. Sinembargo na 2011, e gobierno di otro signatura, a cambia e contracto, añadiendo 15.26% mas pa e compania Canadez, pa un total di 23.5% di e placa total, cu mester a bay pa Canada. Na placa, segun e mandatario, esaki tabata traduci na 104 miyon den tur e añanan cu a bay pa Canada, compara cu 34 miyon cu a bay pa deporte. E intencion ta pa aworaki esaki bolter, significando cu Aruba su deporte lo haya mucho mas placa awor pa inverti. 

NEGOSHA

E intencion ta pa awor den e proximo 90 dianan, stipula e condicionan specifico pa na October firma e contracto nobo entre e compania Canades y Aruba. Mientrastanto a duna aprobacion pa Aruba haya e base bek di e contracto, pa cual e minister a sigura cu Lotto ta bek pa Aruba.