Hooyboer: Caso di scol na Kudawecha ‘bou di investigacion’

ORANJESTAD – “Debi cu ta trata di un asunto cu ta envolvi un menor di edad, mas detayes no por wordo haci publico”. Asina e mandatario responsabel pa enseñansa, Michelle Hooyboer Winklaar a bisa NoticiaCla.com ayera, riba e caso di aparente ‘termento’ di un maestra contra un alumno na e scol primario Kudawecha. Mes momento e mandatario a confirma cu e ta na altura di e carta di mayornan, y cu e la mira e carta aki. (lesa e carta aki). Awe mainta mientrastanto, un grupo di alumno y maestro di e scol, a duna nan version pa e canal di television, esta canal 22, unda cu nan ta splica nan situacion. (wak e entrevista aki). 

CASO DI TERMENTO

E caso ta uno cu a hala hopi atencion, ora cu a bira conoci cu supuestamente e minister encarga lo a bay faborece un mayor cu ken e lo tin amistad y di cual su yiu lo ta e blanco di termento, y lo a manda e scol pa ‘suspende’ e maestra responsabel, Suki Croes, pa e termento. E mandatario por a oficialmente confirma solamente cu ‘tin un caso di investigacion na Kudawecha, regardando un maestra y bullying di un alumno’.

RUMORNAN CIRCULANDO

Varios informacion ta circulando, variando di un version cu ta bisa cu e maestra a ter e alumno di tal forma, cu e lo a te hasta uza e otro alumnonan pa sigui ter e alumno. Otro version ta bisa net lo contrario, y riba cual e carta di mayornan ta basa nan mes. Esta cu e maestro en cuestion ta un persona bon y cu nunca no a haci algo malo antes. Pues cu e medida di suspension lo no ta na su lugar.

PROBLEMA CU DOCTER

Un otro version y mas bien rumor, ta debi cu e carta ta firma pa un mayor, cu ta nada menos cu e director di Imsan, dr. Joel Rajnherc, y cu esaki lo a crea un impasse entre e medico y e mandatario. Ningun di e versionnan aki por a keda confirma pa NoticiaCla.com.