Parlamento a yama Premier pa trata iritacion di Hulanda cu a cambia LNT siman pasa

ORANJESTAD – Parlamento a manda yama premier Wever pa presenta diahuebs mainta pa papia riba e punto cu e hecho cu Parlamento a adapta e ley di Normering Top Inkomens recientemente (ley cu ta ancra e Wever Croes Norm como e regla pa maximalisa salario pa directornan di companianan), cu CAFt ta considera esaki un incumplimento di e norma di presupuesto. “Nan kier tende  di mi kico Hulanda kier men cu Staten no tabata mag di haci cambion a e ley di LNT” e mandatario a specifica diaranson anochi pa e portal aki. E reunion ta poni pa diahuebs mainta 10’or. 

HULANDA TA IRITA

Manera cu e portal aki a raporta siman pasa, Hulanda no tabata contento cu e hecho cu Parlamento durante tratamento di e ley encuestion a dicidi di pasa un amienda, aumentando e plafond di e norma, di 261 pa 329 mil florin annual. “Hulanda ta irita cu e hecho aki” tabata loke fuentenan cerca di gobierno Hulandes na Den Haag a confia noticiacla. Esaki pasobra tabatin un palabracion entre Gobierno di Hulanda y di Aruba, cu awor a keda cambia. Pa nan (Hulanda) ta mescos cu a sosode ora cu Parlamento e tempo ey a opta pa cambia e ley di LAFt mientras cu entre Gobierno di Aruba y Hulanda, tabatin un acuerdo cla caba. Esey a pone cu pa evita esaki den futuro, a bin cu un RAFt cu no por wordo cambia asina asina.