Premier a cancela biahe pa Merca debi na impasse cu CAFt y Hulanda

ORANJESTAD – Debi na e impasse entre Gobierno di Aruba y e colegio di supervision financiero CAFt, prome minister Evelyn Wever Croes a cancela su biahe pa Merca awe diaranson. Tabata e carta di CAFt cu gobierno a ricibi di sorpresa diaranson merdia, cu a cambia tur cos. Den e carta CAFt ta informa RMR cu ta conseha pa duna Aruba un aanwijzing. Esaki a cambia tur cos pa cu e biahe. Ademas, e relacion actual entre Hulanda y Aruba manera cu e ta aworaki, e mandatario no a sinti pa forma parti di e delegacion pa Nacionan Uni. “Na e momentonan aki, mi presencia ta rekeri aki na Aruba” e mandatario a laga sa. E intencion tabata pa e subi avion diaranson 2or pa New York pa forma part di un delegacion di Reino Hulandes na Nacionan Uni. 

CANCELA

E biahe di awe, pues a keda cancela. “Mi mester a cancela esaki pa atende cu CAft y Secretario di Estado van Huffelen, y pa atende cu Gobierno y Parlamento riba e situacion entorno e conseho di CAft. Na e momentonan aki, mi presencia ta rekeri aki na Aruba” e mandatario a sigui bisa. Mes momento e mandatario no ta contento cu e trato cu e ta hayando di Hulanda. “ Ademas, pa e trato cu nos ta hayando di Hulanda, mi no ta sinti pa ta parti di un delegacion di Reino, bou di e slogan “Four Countries, One Kingdom”” e mandatario a bisa. E ta conciente cu tabatin un relato cu a menciona cu e lo a biaha pero cosnan a sosode hopi lihe. “ E relatonan di prensa a sali trempan, prome cu mi a tuma mi decision” e la splica.

E BIAHE

Si e biahe a sigui, e lo a biaha su so pa topa resto di delegacion di Reino eynan. “Mi no ta biaha cu delegacionnan grandi nunca”, e mandatario a bisa noticiacla.” Eynan tey caba di e delegacion Minister President di Sint Maarten Silveria Jacobs

Minister Liesje Schreinemacher  di Buitenlandse Handel di Hulanda ( BHOS) y minister Dennis Wiersma tambe di Hulanda( Primair and Secundaire Onderwijs)” e mandatario a finalisa bisando.