Nuboer: InselAir semper tin dos persona den cockpit

ORANJESTAD – InselAir y InselAir Aruba su sistema di seguridad ta cumpli cu regla internacional pa loke ta nan personal di cockpit. Relaciona cu e noticia awe cu un piloto a sera otro piloto for di e cockpit y causa e accidente aereo na Francia, NoticiaCla.com a acerca InselAir pa sa nan procedura. Y e ta igual cu esun di Merca. “Porta (di cockpit) semper ta sera. Dos persona (ta) semper den cockpit”, CEO di InselAir Aruba, Frederick Nuboer a sigura NoticiaCla.com.

REGLA DI COCKPIT

Unabes cu e noticia di awe mainta a plama, cu ta posible crash intencional e caso di e avion Aleman den seronan di Alps Frances ta, a cuminsa mira ki sistema aerolineanan rond mundo ta aplica pa nan seguridad. A resulta cu Merca p.e tin e regla cu semper tin dos persona den cockpit. Segun Nuboer, ‘un cabin crew (member) ta drenta den e cockpit y sera e porta su tras’. Esaki ta pa evita cu un piloto su so por keda den e cockpit. “Tambe semper ta haci psychologische test ora di recruit flight crew” e CEO a sigui bisa. Segun Nuboer, e biahero cu scohe InselAir, por keda trankil pasobra tin regla y procedura incorpora den trabou di ground, flight y cabin crew pa sigura un operacion safe.

DIFERENCIA CU EUROPA

E diferencia entre e procedura aki y esun europeo, ta cu na europa, no ta rekeri pa tin dos persona den cockpit tur momento. Algo cu aparentemente awor tin cu bay cambia, segun informacionnan cu NoticiaCla.com a ricibi di e rednan internacional.