Wever: A suspende decision pa paga cash so na pompstacion!

ORANJESTAD - E decision di pompnan di gasolin pa paga solamente cu cash entrante mayan, a keda suspendi cu tres luna. Asina minister di Economia Geoffrey Wever a confirma diamars. Esaki despues cu di otro banda, Aruba Bankers Association a bay di acuerdo pa suspende e cobransa di e 'fee' pa tres luna. Esaki ta duna e minister tempo pa yega na un otro solucion. "Manera mi a tuma nota di e publicacion di e dononan di gasolin stations cu nan no lo acepta pago via tarheta mas y solamente cash mi a tuma contacto di biaha cu Aruba Gas Dealers Association (“AGDA”) y tambe cu Aruba Banker’s Association (“ABA”) pa purba intermedia y wak con por yuda pa yega na un solucion" e mandatario a bisa. "Ayera mainta mi a reuni cu AGDA y cu ABA pa scucha nan posicion. Mi a puntra ABA pa temporariamente suspende nan decision pa cobra e fees pa un periodo di 3 luna pa asina Gobierno haya tempo pa busca un solución husto den beneficio di economía Arubiano y e consumidor. ABA a informami cu nan ta compronde e peticion di Gobierno y cu nan ta suspende nan decision te cu 1 oktober proximo pa cobra e fees pa asina Gobierno haya tempo pa por intermedia y traha riba un solucion. Mirando e posicion aki di ABA, AGDA tambe a informami cu nan ta suspende nan decision te cu 1 oktober, pues pa awor tur consumidor por keda paga cu tarheta di debito of credito na cualkier gasolin station" e mandatario a sigui bisa. 

" Mi ta gradici tanto ABA como AGDA pa coopera cu mi peticion. E dianan nos dilanti nos lo investiga con por yega na un solucion husto, den beneficio di economía di Aruba y tur consumidor." e mandatario a finalisa bisando.