Localidad di Soul Beach Music Festival 2015 revela

ORANJESTAD – E aña aki Soul Beach Music Festival tin un localidad nobo. Despues di varios lugar evalua, a dicidi finalmente pa tene e evento e aña aki na e “Harbor Arena”, enves di e lugar usual, cu ta Surfside Beach. Motibo di e cambio ta pasobra tin construccion na Surfside, cu ta nifica cu mester a busca un otro sitio. Un sitio cu tambe ta refleha e ‘beach’ den e nomber di e festival. A opta pa uza e area di e waf, mas parti pabou serca di e ex hotel Bushiri. Eynan por uza e beach tambe y cu suficiente lugar pa parkeer. E espacio di waf no ta nobo pa festival, ya cu den pasado a uza esaki caba tempo di e AIFF (Aruba International Film Festival) algun aña pasa. Solamente cu a uza e parti mas pariba.

ANNIVERSARIO

E aña aki Soul Beach Music Festival ta celebra su di 15 edicion. Durante dianan 20 pa 25 di mei, tur esunnan cu ta centralisa nan vacacion rond di festivalnan di soul, por aprecia y scucha un variacion amplio di artistanan famoso como tambe esunnan ‘upcoming’. E elenco e aña aki ta wordo carga dor di entre otro Charlie Wilson, nomina pa 9 Grammy Award, cu lo sa di entretene tur amante di su latest album “Forever Charlie” un variacion di electro-funk, dance flow y R&B. Diadomingo dia 24 di mei ta toca turno na e famoso Trey Songz cu su musica di R&B soul y pop. Amante di musica ta sigui nan tur parti di mundo y ta premira di bira e espectaculo musical Soul Beach Music Festival na Aruba.

EXPERIENCIA INOVATIVO

“Mientras cu nos ta celebra e di 15 edicion di e festival aki, nos ta pone enfasis riba nos historia y sigui percura pa duna experencianan sutil y inovativo”, asina Mark Adkins, Executive Producer di Soul Beach Music Festival a relata. E mercado di Aruba ta grandi den su cobertura pa loke ta mercadeo digital y social media y Soul Beach Music Festival ta haci uzo di esaki. Si tuma como ehempel cu Trey Songz so tin 16 miyon siguido riba Facebook, esey ya caba ta duna un impresion di e cobertura pa medio di rednan social.

TRES DIFERENTE EVENTO

Soul Beach Music Festival ta propaganda 3 diferente evento. E anochi di ‘stand up comedians’ ta hopi bon bishita, specialmente door di e turistanan. E famoso fiestanan riba beach cu ta trademark caba di e Festival aki y su siguidonan. Y culminante sigur ta e actuacion di artistanan famoso pa deleita di masha hopi amantenan di musica.