Hopi critica riba regla di douane pa registra aparato electronico prome cu biaha

ORANJESTAD – E noticia cu douaneronan ta exigi pa registra aparatonan electronico manera laptop ora cu biaha, a crea hopi critica den comunidad. Interesante ta cu tur aña douane ta bin cu e informacion aki prome cu vacantie, pero ta e biaha aki e critica a bin, debi cu algun medio a pone e tema di registracion electronico den e cabez di e articulo. Esey a hala e atencion y hende a cuminsa lesa e contenido y a bin ripara kico ta kico. 

ILOGICO

E pensamento ta cu ta ilogico pa bay sinta registra tur e aparatonan aki prome cu sali, sigur si cada miembro di famia tin un aparato asina awor, y cu e lo tuma mucho tempo extra y documentacion innecesario. A bisa cu ta compronde cu mester evita cu hende ta drenta cu cosnan sin paga invoerrechten, pero esun di registra tur aparato ta un poco dimas y no practico. Ademas, hopi no ta tene recibo di nan artefacto despues di algun aña. A puntra si douane tin suficiente personal pa bay registra tur hende si tur hende enberdad dicidi di duna oido na e peticion aki y ki problema esaki lo bay trece.