Wever: E ‘timing’ di e decision di gas stations ta uno no faborabel pa pueblo

ORANJESTAD – “Mi ta kere e "timing" di tuma e decision aki ta uno no faborabel pa pueblo” tabata e reaccion di minister di economia Geoffrey Wever diabierna atardi, tumando nota di e relato publico di Associacion di Gasoline Stations di Aruba, fecha 8 di juli 2022. Manera ta conoci, AGSA a anuncia cu entrante 13 di juli 2022 nan no lo ricibi pago mas pa medio di tarheta di Maestro / Debito di banco. “Esaki ta un situacion lamentabel, mirando desaroyonan internacional di prijs di crudo, y e hecho cu ainda Aruba su economia ta den proceso di recuperacion, y tambe e hecho cu nos ta purbando di stimula mas digitalisacion dentro nos economia, cual ta encera mas pago online y menos cash, cual ta mas safe” e mandatario a sigui bisa.

REUNION 

Dialuna benidero e mandatario tin un reunion cu Aruba Bankers Association ("ABA"), y e tambe ta buscando un reunion cu AGDA pa asina tambe scucha di nan banda. “ Nos mester keda realistico cu e realidad pa cual cu e margin di ganashi di gasoline stations ta fiho y regula pa ley, pa cual nan no tin manera pa desvia for di esaki ora ta yega na por ehempel cambia prijs. Tur subida di gasto ta afecta e operacion di gasoline stations y nan cashflow directamente, pa cual nos mester tene na cuenta nan descontento” e mandatario a sigui bisa.

Si ta papia di absorba e gasto, esaki ta nifica un cos, prijs lo subi. “Pa es motibo mi ta kere e "timing" di tuma e decision aki ta uno no faborabel pa pueblo” e la sigui bisa.  “Di parti di ministerio di asuntonan economico, nos lo haci tur cos na nos disposicion pa facilita y yuda trece un resolucion na e situacion aki pronto, caminda ambos partido por sali di acuerdo, y ta minimalisa cualkier efecto negativo pa pueblo”. E realidad segun e mandatario sinembargo, ta cu basicamente no por haci mucho. Y ta mustra cu ta un di e stakeholdernan lo tin cu baha cabez, pa e situacion aki cambia.