Segun encuesta di noticiacla mayoria ta pro derecho di abortus na Aruba

ORANJESTAD – Segun e ultimo encuesta di noticiacla unda cu un di e topiconan tabata abortus, un grupo mas grandi a mustra cu nan ta pro abortus, y contra e hecho cu Merca awor a revoca e poder federal pa proteha abortus. A raiz di e decision monumental ey, noticiacla a haci e pregunta localmente. Un total di 850 persona a participa na e encuesta unda cu e otro tema tabata ley di matrimonio di mesun sexo. 

CAMBIO MONUMENTAL

Tabata algun siman pasa cu Corte Supremo na Merca a revoca e ley conoci como Roe vs Wade, unda cu pa mas di 50 aña na nivel federal, e derecho di comete abortus tabata considera como legal. Corte Supremo awor a revoca e ley, dictando cu riba nivel Federal, no por proteha esaki mas. Esey kier men cu ta keda na cada estado Mericano individualmente, si ta considera derecho di abortus como legal of no. E consecuencia ta cu varios estado ta conoci caba cu lo sea prohibi of permiti abortus. 

SITUACION NA ARUBA

Den e encuesta, 63% di esnan cu a participa, ta contra e decision di Corte Supremo na Merca, mientras cu 37% ta pro. Y riba e pregunta cu si na Aruba mester sigui e mesun paso, esta kita e proteccion nacional pa dicidi riba abortus, 64% a bisa cu no y 36% a bisa cu si. Esey ta traduci e ora cu mayoria di esnan cu a participa, ta pro abortus y no ta na fabor pa regula esaki manera cu a sosode na Merca. 

DISCLAIMER 

Manera semper, e resultado di e encuesta aki, ta pa metanan puro noticioso. Ademas, tambe, no ta pretende cu e resultadonan obteni ta un refleho di Aruba completo, sino di usuarionan cu tin aceso na e portal noticiacla. Un total di 850 persona a participa na e encuesta (e mester ta minimal 500 pa por tin un representacion), di cual mayoria tabata hende muher.