Eman: Aruba no ta strobando Corsou cu asunto di visa

ORANJESTAD/WILLEMSTAD – Corsou no ta contento cu ainda Aruba no a tuma decision riba e asunto di visa pa colombianonan bin nos islanan. Premier Mike Eman a bisa NoticiaCla.com e siman aki (lesa articulo adhunto aki), cu no a tuma un decision ainda riba e caso ey. Den e cuadro ey, e mandatario no a compronde di unda a sali cu e lo a bisa su colega minister di Corsou, Ivar Asjes, cu Aruba a dicidi caba cu no ta kita e visa pa colombianonan (lesa e articulo corespondiente aki). Un declaracion cu segun e presidente di camara di comercio di Corsou na NoticiaCla.com, Eman lo a haci na Asjes. “Nos no a notifica ningun hende. Nos no a ni tuma e decision, corda pa notifica cualkier pais di un decision” Eman a sigura NoticiaCla.com

RECLAMO NO CONOCI

E hecho cu Corsou ta reclama cu Aruba ta strobando e di keda cla cu e asunto di visa pa colombiano, ta algo nobo pe. “Mi no a tende cu Aruba ta strobando Corsou” Eman a bisa. Ora cu a confronta e mandatario cu e declaracion di Kvk di Corsou, e la desmenti esey. “Cada pais tin nan representante cu ta cuida nan interes, y ta libertad di e representantenan ey cu ta cuida interes di nan comercio, pa por señala cosnan cu nan ta kere cu pa interes cu nan ta sirbiendo, tin cualkier opinion riba esaki”. E no ta kita nan derecho asina. Foto cortesia Jopie Abraham/Twitter.com