Segun HAVA, na Aruba no tin suficiente dokter di cas

ORANJESTAD – Na Aruba desafortunamente no tin suficiente dokter di cas. Asina e asosacion di dokternan di cas HAVA a bisa e siman aki riba nan pagina di Facebook. Como ehempel, a mustra 3 dokter nan cantidad d pashent, versus cuanto pashent cada dokter tin na Hulanda actualmente. A mustra cu p.e. na e praktijk di Dr. A. Wever tin 2389 pashent inscribi. Na esun di Dr. J. van Trigt 2523 y na esun di Dr. A. Singh-Tewarie 2408. “Kiko ta un cantidad di pashent sostenibel pa cada praktijk di dokter di cas na Aruba?” e asosacion ta puntra? Y ta mustra cu  al momento, cada praktijk tin promedio di 2.300 pashent door cu na Aruba desafortunamente no tin suficiente dokter di cas. Na Hulanda e cifra aki ta 2095. 

SIGURA CALIDAD

Segun HAVA, pa por sigura cu e pashent por haya e calidad di cuido cu e mester di su dokter di cas, stakeholders mester traha hunto pa por realisa un cantidad di pashent cu e dokter di cas por maneha na un manera sostenibel. 

OVERBELAST

HAVA su dokternan di cas kier yega na un situacion unda no ta "overbelast" e sistema di cuido primario, pa nan tambe como specialista den nan trabou brinda e servicio cu nan por. E experiencia aworaki ta cu door di e ampliacion di e cantidad di cuido cu ta wordo pidi, extra responsabilidadnan administrativo y exigencianan di calidad, no ta resta suficiente tempo pa cada pashent haña e atencion cu nan merece. Esaki ta preocupante y ta locual HAVA ta pidi atencion pe.  “ Solamente hunto nos por yega na un situacion duradero cu e meta pa mehora nos sistema di cuido na Aruba unda tur partido involucra lo beneficia” e asosacion ta finalisa bisando.