Croes: Tur caso di FASE ricibi incorectamente a keda coregi of ta den proceso

ORANJESTAD – Tur fayo cometi cu e proyecto di FASE durante e pandemia, sea a wordo regla of ta keda regla proximamente. Esey por a compronde di minister Glenbert Croes, responsabel pa e proyecto ora cu esaki a inicia na 2020. Mes momento, manera por a spera, e la condena e actitud di e partidonan di oposicion AVP, MAS y ACCION21 cu a vota contra e ley dialuna ultimo. Segun e mandatario, e ta lamenta e politikeria cu ta wordo haci cu dolor di hende, y cu e situacion. A gradici e dos partidonan cu si a sostene e ley, partido MEP y RAIZ, pa nan sosten. 

E SITUACION

E mandatario a haci mencion di mayoria di e casonan cu a bin dilanti como ‘irregular’ pa cual e la haya un ola di critica politicamente, manera con hende cu a fayece a haya FASE, ambtenaar, y personanan cu a haya tanto FASE, como pensioen y mas di e tipo di casonan ey. Pa cada uno, e la purba pinta un scenario cu tabata e supuesto motibo di e iregularidad aki, splicando tambe cu mayoria ta wordo ‘verrekend’, y of cu ta den e proceso pa colecta e placa ricibi incorectamente, bek. 

E CASONAN

Entre e casonan menciona ta bisa cu 35 persona a haya FASE double, 49 a haya FASE y Bijstand, 2 ta personanan cu a solicita pero cu na caminda a fayece, y 29 ta persona cu ta traha como ambtenaar na gobierno. Tur ta casonan cu no mester a sosode y pa cual dos rapport di Centraal Accountants Dienst y Raad van Advies a baha pisa ariba den nan respectivo rapport, tildando e proceso como uno bon pa comete fraude. E mandatario a keha esaki tambe, indicando cu uso di e palabranan aki no ta corecto.