ATA: Rekisito pa venezolanonan drenta Aruba, valido for di 2009

ORANJESTAD/CARACAS – Oficina di turismo di Aruba (ATA) a emiti un boletin awe na Caracas, Venezuela pa clarifica e asunto di rekisito necesario pa un venezolano por drenta Aruba. Esaki, a rais di e confusion crea e siman aki door di aerolineanan venezolano riba rekisito ‘nobo’ pa drenta Aruba. Manera cu NoticiaCla.com a raporta e siman aki, varios aerolinea a pone un afiche na e counter di e respectivo aerolineanan, indicando cu mester di e.o. un suma specifico pa por drenta Aruba. E boletin ‘nobo’ mester a sirbi pues pa evita mas confusion.

COMUNICADO

Den e comunicado (por lesa e documento aki), ATA ta splica kico tur ta necesario pa drenta Aruba y a base di kico e ta necesario. Tambe ta purba clarifica e mal confusion. ATA ta cuminsa na indica, cu e regla cu ta rekeri pa tin suficiente fondo pa drenta Aruba no ta nada nobo. De hecho, e ta data for di 2009 segun e asina jama ‘toelatingsbesluit’ cu ta stipula e rekisitonan necesario. E ta stipula entre otro, cu un pasahero ‘venezolano’ mester por presenta un pasaporte valido durante e estadia na Aruba, prueba di hospedaje, fondo necesario, y un pasashi round-trip. Nan por wordo puntra pa mustra esaki den forma discreto pa e agente di imigracion, ora cu nan yega Aruba.

VISA PA VENEZOLANO?

Mes momento ATA ta clarifica den e comunicado cu ,-contrario na e informacionnan eroneo-, venezolanonan cu biaha pa Aruba, no mester di un visa, manera cu un colombiano si mester. De hecho, ta nombra tur e paisnan cu mester di un visa pa drenta nos isla. Aki ta mustra cu e unico tres paisnan Latino americano fuera di Colombia, cu meste di visa pa drenta Aruba, ta Peru y Bolivia. “Te cu e fecha di e comunicado aki, e informacion cu un venezolano mester di visa pa drenta Aruba, ta incorecto”.