Parlamento diamars anochi a aproba ley pa legalisa FASE

ORANJESTAD – Ayera nochi laat e ley di FASE a pasa den Parlamento, cu ta legalisa e proyecto cu a financia ciudadanonan cu a keda desampara ora cu e pandemia Covid19 a dal Aruba na comienso di 2020. Mientras cu gran parti di esnan cu a participa a keda yuda, a resulta cu hopi tambe a abusa di e proyecto, unda cu nan a ricibi placa cu nan no tabatin derecho ariba. E mandatario encarga Glenbert Croes a sigura cu nan lo wordo ‘persigui’ y cu nan lo tin cu paga cada debchi bek cu nan a gana den un forma no corecto. E la admiti cu fayonan a wordo cometi, pero ta refuta cu a haci cosnan illegal y pa enrikese su mes y e partido. Mes momento a lamenta e rapportnan di tanto CAD como RvA cu a critica e proyecto severamente pa su falta di legalidad y practica cu no tabata corecto.