Parlamentario di Raiz ta co-firmante cu Accion21 di ley pa matrimonio di mesun sexo

ORANJESTAD – Parlamentario pa partido Raiz, Misha Raymond a informa diabierna cu e ta apoya matrimonio di mesun sexo y cu e ta cofirmante hunto cu parlamentario Miguel Mansur di un ley di niciativa pa haci esaki un realidad. Segun Raymond, Cu fin di juni ta yega na clausura di luna di orguyo, Plataforma Raiz kier manda un palabra di elogio na miembronan Parlamentario Misha Raymond y Minister Geoffrey Wever trahando pa un sociedad inclusivo. E hecho cu un parlamentario di partido di coalicion ta co-firmante ta interesante mirando e posicion di e partner di coalicion MEP, cu a mustra den pasado caba cu nan no ta cla pa un ley manera cu esaki a keda proponi aworaki. Hasta den partido di oposicion actual AVP tabatin resistencia tempo cu e partido tabata na mando algun tempo atras. 

SOSTEN

Misha Raymond a bisa de su comunicado cu e ta apoya matrimonio di mesun sexo y ta medetekenaar hunto cu Parlamentario Miguel Mansur di un ley di iniciativa pa haci esaki un realidad. Tambe Misha lo agrega na e ley un splicacion di e posibel efectonan psicosocial, riba esnan den e comunidad LGBTQIA+ pa haya e reconocimento cu nan ta casa, y cu nan tin e mesun derechonan legal cu pareha di diferente sexo. 

MINISTER GEOFFREY WEVER

Como Minister encarga cu Desaroyo Sostenibel y realisacion di e “Sustainable Development Goals” (SDG’s), Geoffrey Wever ta enfoca riba e reduccion di desigualdad. Minister Wever ta para pa igualdad den e mas amplio sentido. Cada ciudadano tin derecho riba beneficio di un union civil, cual ta encera entre otro, pensioen, belasting, derechonan di siguridad social etc. E ta un deber di gobierno pa percura cu tur ciudadano tin e mesun derecho huridico, si ta papia di pareha casa of un union civil. Ambos mester ta igual den bista di ley. Pa es motibo, Minister Wever ta trek un comision pa tuma inverntarisacion di e cambionan di nos Codigo Civil cu mester tuma lugar pa elimina desigualdad na Aruba.

Cu e esfuersonan andando, Plataforma Raiz ta satisfecho cu ta promove puntonan cardinal di cual Raiz a enfoca riba nan durante campaña. Aruba ta enfrenta retonan economico, social y tambe di sotenibilidad. Esakinan ta keda pilarnan cu lo sigui dedica atencion na nan pa trece mehoracion na maneranan responsabel y duradero.