Dos arubiano lo no bringa extradicion pa Merca

ORANJESTAD – Tur dos arubiano, -esta C. Sabino y Robert S cu ta acusa di ta envolvi den traficacion di droga-, a abstene di bringa e decision di extradicion pa Merca. Vocero di ministerio publico, Ann Angela a confirma esaki pa NoticiaCla.com. Esaki ta nifica cu e unico ainda cu por para e extradicion ta gobernador di Aruba, cu tin cu aproba esaki awor pa medio di su firma. Hunto cu e dos arubianonan, tin dos colombiano cu tambe a abstene di bringa e decision y como tal si gobernador aproba e extradicion, un total 4 persona pronto lo ta riba avion pa Merca pa para responsabel pa nan acto relaciona cu traficacion di droga.

APELACION

Manera raporta anteriormente e siman aki, e dos simannan a vence despues cu Hof a bay di acuerdo pa e dos arubianonan wordo extradita pa Merca. Si dado caso e arubianonan a dicidi cu nan ta apela y bay den casacion, e proceso lo a bira uno mas largo. Si nan a opta pa no bringa esaki, ta den cuestion di dia cu e dos arubianonan por ta riba avion pa Merca unda cu nan lo tin presenta den corte mericano y wordo husga riba cargo di traficacion di droga.

MAS ARUBIANO

Ora cu dos siman pasa NoticiaCla.com a raporta cu Hof a aproba e extradicion pa e arubiano C. Sabino pa Merca,  a resulta cu no ta solamente Sabino, sino Robert S. (otro arubiano) su extradicion tambe a wordo aproba. Fuera di e dos arubianonan aki, tin dos colombiano Yecid M.T. y Jhon F.D.M. cu tambe a haya aprobacion pa wordo extradita. Tur cuater tabatin te ayera pa apela e decision di Hof.

MAS CASO DI EXTRADICION

Tambe e siman aki Hof a trata e caso di extradicion di dos persona mas, esta Elpidio M.C. y Rosa M.M. Ambos tambe ta basa riba acusacionnan di droga den nan contra. Pa e dos personanan aki, Hof ta dicta sentencia dia 2 di april proximo.

CASO DI ARUBIANONAN

Riba 10 di maart ultimo cu Hof a aproba peticion di extradicion di e dos arubianonan C. Sabino y Robert S. pa Merca. Algun agente secreto di Homeland Security a biaha bin Aruba y a haci deal cu algun persona na Aruba pa traficacion di droga pa Merca. Ta ser papia di 10 kilo, caminda nan a bin cu e placa for di Merca, cumpra e droga aki na Aruba y pasa via Duana Americano bay cu esaki Merca.

PIDI EXTRADICION

Despues cu e droga a yega Merca, Homeland Security a manda pidi extradicion di algun persona y e personanan aki a wordo deteni na october 2014. Sabino mas bien a fungi como traductor den e combersacion entre e agentenan secreto y e personanan cu e droga na Aruba. E dos agentenan secreto tabatin combersacion cu dos persona di Aruba na un luga publico, caminda e momento ey e agentenan a duna un cantidad di placa cu un otro persona lo a manda for di Merca pa 10 kilo di cocaina. E agentenan a haya e 10 kilo aki den aeropuerto for di un tercer persona y nan a biaha cu esaki bay Merca.

GOBERNADOR

Hof awor mester informa Gobernador di nan conseho y ta keda na Gobernador si e ta firma pa e extradicion keda formalisa. A yega di sosode cu Gobernador a rechasa peticion. Si Gobernador aproba e extradicion, y nan no bringa esaki, ta cuestion di algun dia cu e agentenan lo bin Aruba pa busca e sospechoso pa e bay Merca.