Gobierno di Corsou a ‘hala atencion’ di consul di Venezuela

WILLEMSTAD - Premier Ivar Asjes a reuni cu consul di Venezuela Marisol Gutierrez de Almeida awe mainta, pa reclama oficialmente di e accionnan reciente di su consulado. Durante e reunion ey, Asjes a splica Almeida cu e accion di peticion contra presidente mericano Barack Obama no ta algo cu por sigui na Corsou. “E accion ey ta atacha e neutralidad cu Corsou ta mantene den e conflicto entre Merca y Venezuela”. Segun Asjes, e relacion amistoso cu e dos paisnan no por wordo menasa pa motibo di e ‘pelea’ aki. E peticion di Venezuela ta nan reaccion riba e mensahe di Obama, cu Venezuela ta un menasa pa seguridad nacional di Merca. Na Aruba, prome minister Mike Eman tabatin solamente palabra di cautela pa cu e relacionan y cu ta vigila e situacion di serca. Na Aruba tambe tabatin accionan semehante door di consulado venezolano, pero aki gobierno di Aruba no a actua. Solamente e parlamentario Glenbert Croes a haci un declaracion na fabor di Venezuela, cu a hala basta atencion. 

EXPULSA FOR DI MERCA

No ta prome biaha cu e consul ta den problema. E la wordo expulsa for di Merca na 2013, como represaya di Merca pasobra Venezuela a declara un diplomatico mericano ‘persona non grata’ na Caracas. Como represaya, Merca a duna Venezuela 48 ora pa tres diplomatico bandona Merca. Un di nan, tabata e actual consul venezolano na Corsou, ora cu e tabata staciona na Houston, Texas den e consulado eynan.

FUNCION NA CORSOU

Gutierrez ta apenas 2 luna den funcion, y a cuminsa su trabou na Corsou, fin di januari ultimo. E potret, cortesia di oficina di gobierno di Corsou, ta momento cu Asjes ta reuniendo cu e diplomatico, y ta ‘atende’ riba su comportacion.